საქართველოს პრემიერ-მინისტრ ნიკოლოზ გილაურის განცხადებით, საქართველოში ჩამოსული ვიზიტორი დღე-ღამეში 250 დოლარს ტოვებს.
"სიღნაღი, ბათუმი ანაკლია და სხვა - ეს ყველაფერი იმიტომ კი არ კეთდება, რომ ჩვენ გაგვიხარდეს, არამდეს ეს კეთდება იმისათვის, რომ საქართველოში ჩამოსულმა ადგილზე ნახოს და შემდგომ ამის შესახებ ინფორმაცია თავის ქვეყანაში წაიღოს", - განაცხადა გილაურმა ვიდეოკონფერენციის დროს.
როგორც "ათპუნქტიან" გეგმაშია" აღნიშნული, ტურიზმის განვითარება უნდა განხორციელდეს ორი მიდგომის კომბინირებით: "ჰორიზონტული პოლიტიკით", რაც მიმართულია ტურიზმისათვის ირიბი წამახალისებელი გარემოებების შექმნით, და "ვერტიკალური მიდგომის" გამოყენებით, როგორიცაა ტურისტულ ინფრასტრუქტურაში ინვესტირება.
"საქართველოს მთავრობის მიზანია, 2015 წლისთვის ტურისტების რაოდენობა 5 მილიონს გადააჭარბოს და ქვეყანა გახადოს ზამთრის ტურიზმის ერთ-ერთი ცენტრი. გაიზრდება ყოველწლიური ტურისტული სარეკლამო კამპანიები იმ ქვეყნებში, საიდანაც ტურისტების მოზიდვის პოტენციალი მაღალია, კერძოდ - ბელორუსი, უკრაინა, პოლონეთი, ისრაელი, ბალტიისპირეთის ქვეყნები. პრიორიტეტულია დაბალბიუჯეტიანი ავიახაზების ოპერატორების მოზიდვა, პირდაპირი ფრენების სამი ძირითადი მიმართულებით დივერსიფიკაცია (დასავლეთ ევროპა, ახლო აღმოსავლეთი და აზია)", - აღნიშნულია გეგმაში.