ეკონომიკური თავისუფლების აქტის თანახმად, 2014 წლიდან ბიუჯეტის დეფიციტი უნდა შეადგენდეს არა უმეტეს მშპ-ის 3%-ს. მთავრობის ათ პუნქტიან სამოქმედო გეგმაში აღნიშნულია, რომ მთავრობის ამოცანაა, ბიუჯეტის ხარჯებისა და არაფინანსური აქტივების წილი მშპ-სთან იყოს `მცირე მთავრობის~ ფარგლებში, რათა საგადასახადო წნეხმა და მთავრობის აქტივობამ არ შეზღუდოს სივრცე სამეწარმეო აქტივობისათვის, კერძო ინიციატივებისა და ინვესტიციებისათვის.
ეკონომიკური თავისუფლების აქტის მიხედვით, ბიუჯეტის ხარჯებისა და არაფინანსური აქტივების ზრდის მთლიანი მოცულობის წილი არ უნდა აღემატებოდეს მშპ-ის 30%-ს 2014 წლიდან.
გეგმაში აღნიშნულია, რომ გრძელვადიანი ეკონომიკური სტაბილურობისათვის სახელმწიფოს მიერ ვალდებულებების სათანადო დონეზე შესრულებისა და ინვესტორთა ნდობის შესანარჩუნებლად აუცილებელია ბიუჯეტის დეფიციტი შენარჩუნდეს რაც შეიძლება დაბალ დონეზე. საქართველოს მთავრობის მიზანია მაქსიმალურად დაბალანსებული ბიუჯეტის უზრუნველყოფა, რაც, ერთი მხრივ, საჭიროების შემთხვევაში ახდენს ეკონომიკურ სტიმულირებას და მეორე მხრივ, გლობალური ეკონომიკური გამოწვევების გათვალისწინებით, ქვეყნის ფისკალური და მაკროეკონომიკური სტაბილურობის უმნიშვნელოვანესი საწინდარი და სამუშაო ადგილების შექმნის მამოძრავებელია.
