2015 წლისთვის სახელმწიფო საგარეო ვალის მომსახურების პროცენტი სახელმწიფო ბიუჯეტთან მიმართებაში 9%-ზე მაღალი არ იქნება, ხოლო მშპ-სთან მიმართებაში _ 3%. სწორედ ამას ითვალისწინებს მთავრობის ათ პუნქტიანი სამოქმედო გეგმა, რომლის განახლებული ვერსიის განხილვას მთავრობა უკვე საჯაროდ ახდენს.
გეგმაში აღნიშნულია, რომ საქართველოს მთავრობის ამოცანაა, საგარეო სახელმწიფო ვალის პორტფელმა შეინარჩუნოს ხელსაყრელი ფინანსური პარამეტრები, რომლებიც უზრუნველყოფენ მის მდგრადობას როგორც მოკლევადიან, ასევე საშუალო- და გრძელვადიან პერსპექტივაში.
სახელმწიფო საგარეო ვალის კონსერვატიული და პრაგმატული მართვა საწინდარია ქვეყნის დაცულობისა და ფისკალური მდგრადობის, სხვადასხვა ტიპის გლობალური/ეგზოგენური რისკებისა და გამოწვევების არსებობის პირობებში. სახელმწიფო საგარეო ვალის დონემ არ უნდა შეუქმნას საფრთხეები ეკონომიკურ და სოციალურ სტაბილურობას; აქედან გამომდინარე _ არც სამუშაო ადგილებსა და მათი შექმნის პერსპექტივას. მთავრობის მიერ ინიცირებული ეკონომიკური თავისუფლების აქტის მიხედვით, სახელმწიფო ვალი ლიმიტირებულია და მისი დონე უნდა შეადგენდეს არა უმეტეს მშპ-ის 60%-ს. ამასთან, ფისკალური და ზოგადად მაკროეკონომიკური პოლიტიკის ერთ-ერთი სახელმძღვანელო პრინციპი და საშუალოვადიანი ამოცანა იქნება სახელმწიფო საგარეო ვალის თანმიმდევრული შემცირება მშპ-ის 25%-მდე.
მთავრობაში განმარტავენ, რომ, მსოფლიო კრიზისის გაღრმავების შემთხვევაში ქვეყანას ექნება რეზერვი, ეგრეთწოდებული _ `ფინანსური ბალიში~, რაც დღეს ბევრ განვითარებულ თუ განვითარებად ქვეყანას არ გააჩნია, ვალი გაზარდოს მშპ-ის 20-30%-ით, მშპ-ის 60%-იან ზღვრამდე და ამით შეინარჩუნოს ეკონომიკური აქტივობა და დასაქმების დონე.