ბიზნესფორუმზე გარკვეული დრო დაეთმობა ორმხრივ შეხვედრებს, სადაც ქართულ კომპანიებს შესაძლებლობა ექნებათ, შეხვდნენ და მოლაპარაკებები გამართონ პოტენციურ ბიზნესპარტნიორებთან შესაბამისი სექტორების მიხედვით. უკრაინის დელეგაციაში შემავალი ბიზნესმენები წარმოადგენენ კომპანიებს სოფლის მეურნეობის, საფინანსო, ტელეკომუნიკაციის და ტურიზმის სფეროებიდან. მათი მიზანია საქართველოში ბიზნესპარტნიორების მოძიება და საქმიანი ურთიერთანამშრომლობის დაგეგმვა.

უკრაინა აქტიურად ინტერესდება საქართველოს მთავრობის მიერ განხორციელებული მყისიერი რეფორმებით, რაც გამოიხატება წელს უკრაინული დელეგაციების ხშირი ვიზიტებით ჩვენს ქვეყანაში და ასევე მრავალი სატელევიზიო სიუჯეტით, რომლებსაც წამყვანი უკრაინული ტელეარხები უძღვნიან საქართველოს წინსვლას, როგორც ბიზნესის, ისე პოლიტიკური კუთხით. 2011 წლის დასაწყისიდან უკრაინიდან საქართველოს 4 დელეგაცია ესტუმრა, ამასთანავე ინდივიდუალური ვიზიტები განახორციელეს პოტენციურმა ინვესტორებმა.

საქართველოს ეროვნული საინვესტიციო სააგენტო არის ერთადერთი სახელმწიფო უწყება, რომელიც ხელს უწყობს ქვეყნის საინვესტიციო გარემოს შესახებ ცნობადობის ამაღლებას, ახდენს უცხოური პირდაპირი ინვესტიციების მოზიდვას და ამასთანავე ახორციელებს კონკრეტული საინვესტიციო პროექტების მართვას.

დღესვე შედგება ქართულ-უკრაინული საქმიანი კლუბის შეხვედრა უკრაინელ მეწარმეთა დელეგაციასთან, რომლებიც ესტუმრებიან თბილისს ქართულ-უკრაინული საქმიანი ფორუმის ფარგლებში. დელეგაციის ვიზიტის მიზანია შემდგომი თანამშრომლობისთვის საქართველოში პარტნიორების მოძიება.

ქართულ-უკრაინული საქმიანი კლუბი უმასპინძლებს სხვადასხვა დარგის (სოფლის მეურნეობა, კვების მრეწველობა, მანქანათმშენებლობა, მედიცინა, მომსახურება და სხვა) 30-ზე მეტ უკრაინელ მეწარმეს. მათთვის წარმოდგენილი იქნება პრეზენტაციები საქართველოში ბიზნეს საქმიანობის წარმართვის პირობებისა და უპირატესობების შესახებ, ასევე მოეწყობა ქართველ ბიზნესმენებთან ორმხრივი შეხვედრები.

ქართულ-უკრაინული საქმიანი კლუბის უკრაინელ მეწარმეებთან შეხვედრას დაესწრება საქართველოში უკრაინის საელჩოს და საქართველოს სავაჭრო-სამრეწველო პალატის წარმომადგენლები.