ლიბიელი ყოფილი ლიდერის მუამარ კადაფის ვაჟი სეიფ ალ-ისლამი, რომელზედაც საერთაშორისო ძებნაა გამოცხადებული, ახალი მიმართვით გამოდის, რომელსაც არაბული მედია აქვეყნებს. საინფორმაციო სააგენტო "არ-რაი ალ-არაბი" მუამარ კადაფის ვაჟის მიმართვას აქვეყნებს.
"ამ ისტორიულ დროს, როდესაც მრავალი მიიჩნევს, რომ ყველაფერი დამთავრდა და ყველაფერი განადგურდა, მსურს ჩემი ამოცანები ნათლად ჩამოვაყალიბო - ყველაფერი მხოლოდ ახლა იწყება", _ აცხადებს სეიფ ალ-ისლამი და აღნიშნავს, რომ იგი ყოველთვის სჯიდა ლიბიის მოღალატეებსა და გამყიდველებს. ისლამი მათ "ცხოვრების ჯოჯოხეთად ქცევას" ჰპირდება, იმის გამო, "რაც მათ ქვეყანას დამართეს".
სეიფ ალ-ისლამი მოუწოდებს თავის მომხრეებს ბრძოლისკენ "დაკარგული ლიბიისა და დაკარგული ღირსების აღსადგენად" და შურისძიებისთვის "დამნაშავეებსა და მკვლელებზე".
"ჩვენ უნდა ვდევნოთ და გავანადგუროთ მკვლელები ყველგან, სადაც არ უნდა იყვნენ ისინი", _ აცხადებს სეიფ ალ-ისლამი.
აღსანიშნავია, რომ სეიფ ალ-ისლამს მუამარ კადაფის მემკვიდრედ მიიჩნევდნენ. მან მამასთან ერთად მონაწილეობა მიიღო სირტის დაცვის ოპერაციაში, მაგრამ ალყის გარღვევა და მიმალვა შეძლო.
