"ციხე - ეს დახურული, არაადამიანური და ხისტი სივრცეა, რომელსაც სულელური ლოგია აქვს, თუკი ასეთი რამ საერთოდ არსებობს. თუმცა აქ მაინც ხდება, რომ საინტერესო ადამიანებს ხვდები. შინაგანაწესი აქ ძალიან მკაცრია. მე ბარაკის სექციაში ვიმყოფები კიდევ დაახლოებით 20 პატიმართან ერთად. აქ ყველა უნდა მოერგოს აქაურობას და მე გამონაკლისი არ ვარ. თუმცა ძლიერი ნერვები, საშუალებას მაძლევს ძილისთვის განკუთვნილი დრო დანიშნულებისამებრ გამოვიყენო. თავისუფლების დროს გაცილებით ნაკლები მეძინა, ვინაიდან იქ ოჯახი არსებობდა და საყვარელი საქმე", _ ჰყვება მიხაილ ხოდორკოვსკიდა აგრძელებს, რომ სულ ბარაკში დაახლოებით 200 მსჯავრდებულია, რომელთა საშუალო ასაკი 25 წელია.

"მე პატივისცემით მეპყრობიან ასაკისა და ცნობილობის გამო. ფულზე კითხვების დასმა კი აქ არ სჩვევიათ. ვიკვებები იმით რასაც, სასადილოში მაძლევენ. ფაფა, კარტოფილი თევზის ან ხორცის პატარა ნაჭრით, პური. მე მყოფნის. ისევე, როგორც ყველა სხვა პატიმარი, მეც ორ თვეში ერთხელ ოჯახისგან ამანათს ვიღებ. ამანათში პროდუქტები და საყოფაცხოვრებო ნივთებია. ისევე როგორც ყველას, მაქვს რაღაცის ყიდვის საშუალება ციხის მაღაზიაში, თანხა მცირედია, დაახლოებით 100 აშშ დოლარი თვეში. აქ პირველადი მოხმარების საქონელი იყიდება. ალკოჰოლი აქ აკრძალულია, მაგრამ ჩემთვის ეს აკრძალვა ყველაზე რთული ნამდვილად არ არის", _ აცხადებს ხოდორკოვსკი.

მისი თქმით, დილით ვარჯიშისთვის 15 წუთია გამოყოფილი, შემდეგ კი "ცეხში მუშაობის" ფიზიკური დატვირთვა მოდის. ცხოვრების პირობები, კლიმატი და სანიტარული პირობები აქ საკმაოდ რთულია, მაგრამ მადლობა ჩემს მშობლებს, მე კარგი ნერვები და ჯანმრთელობა მაქვს - ავად გახდომა კი აქ უკიდურესად არასასურველია".

ხოდორკოვსკი ასევე აცხადებს, რომ მის წინააღმდეგ ფიზიკურ ძალადობას ადგილი არ ჰქონია.

მისი თქმით, ინტერნეტი და ტელეფონები კოლონიაში აკრძალულია, ხოლოდ ტელევიზორის ყურება განრიგით ხდება. თუმცა, მიუხედავად ამისა, მიხაილ ხოდორკოვსკი აცხადებს, რომ მას არ სწყინდება. იგი იწერს სხვადასხვა ბეჭდურ გამოცემებს და საზოგადოების ევოლუციაზე და ქვეყნის მომავალზე ფიქრობს.

"მოწყენა ჩემი პრობლემა არ არის. შესაძლოა, ვინმეს გაუკვირდეს, მაგრამ სინამდვილეში ძალიან დაკავებული ვარ. გარდა აუცილებელი სამუშაოსი საამქროებში და ადვოკატებთან, მე ვკითხულობ წერილებს, რომლებიც დიდი რაოდენობით მოდის ჩემს სახელზე, ვპასუხობ მათ და თვალყურს ვადევნებ ჩემს ქვეყანაში მიმდინარე მოვლენებს", _ აცხადებს ხოდორკოვსკი.

კომპანია "იუკოსის" ყოფილი ხელმძღვანელი აცხადებს, რომ 2012 წელს რუსეთის საპრეზიდენტო არჩევნებზე ვლადიმერ პუტინის გამარჯვებაში ეჭვი არ ეპარება.

"სხვა რამ არც შეძლება მოხდეს, მან ხომ, ფაქტობრივად, "გაწმინდა" რეალური პოლიტიკური ოპოზიცია და მასობრივი საინფორმაციო საშუალებები რუსეთში. საუბარი ხომ საერთოდაც არ მიდის არჩევნებზე, არამედ ხელისუფლების შენარჩუნების მექანიზმზე ადამიანების ერთი და იმავე ჯგუფის მიერ. ვინაიდან ალტერნატივა "პუტინი ან მედვედევი" არ არსებობს, რეფორმირების საშუალებები, ჩემი აზრით, არ არის. პუტინი ქვეყნის პრეზიდენტის რანგში მომავალი 6 ან 12 წლის განმავლობაში ნიშნავს, რომ ეს წლები დაკარგული იქნება ჩემი ქვეყნისათვის", _ აცხადებს ხოდორკოვსკი.
მისი თქმით, რუსეთის განათლებული ახალგაზრდობა უკვე ამას მიხვდა, იგი პუტინს თავის კუმირად არ მიიჩნევს და უახლოეს მომავალში ქვეყნის დატოვებას აპირებს.

"მე მჯერა საკუთარი თავის და ჩემი ქვეყნის მომავლის, იმის მიუხედავად, რომ ჩემი ახლანდელი ცხოვრების პირობები ამას ხელს არ უწყობს. სრულიად დარწმუნებული ვარ, რომ დადგება დღე, როდესაც სიმართლე იზეიმებს. ყოველთვის ასე იყო და ასე იქნება. ხოლო ჩემი ამოცანაა გავაკეთო ყველაფერი იმისთვის, რომ ეს დღე რაც შეიძლება მალე დადგეს", - აცხადებს ხოდორკოვსკი.