რუსეთის გენერალურმა პროკურატურამ "დომოდედოვოს" აეროპორტში მომხდარ ტერაქტში ბრალდებულები - დოკუ უმაროვსა და ასლან ბიუდუკაევს დაუსწრებლად აღმკვეთ ღონისძიებად პატიმრობა შეუფარდა. ინფორმაციას ამის შესახებ რუსეთის გენპროკურატურა ავრცელებს.
"ძებნაში მყოფი დოკუ უმაროვისა და ასლან ბიუდუკაევის მიმართ გამოტანილია დადგენილება და სასამართლოს მიერ მათთვის აღმკვეთი ღონისძიების სახით პატიმრობაა შეფარდებული", _ იუწყება გენპროკურატურა.
აღსანიშნავია, რომ ჩეჩნეთის მეთაური რამზან კადიროვი რამდენიმე ხნის წინ ჩრდილოკავკასიელი მებრძოლების ლიდერის დოკუ უმაროვის მოძებნისა და დაპატიმრების მოწოდებით გამოვიდა.
"დღემდე არ არსებობს ზუსტი მონაცემები იმისა მკვდარია დოკუ უმროვი თუ ცოცხალი, მაგრამ ნებისმიერ შემთხვევაში ვირთხამ თავისი სიცოცხლე ციმბირის კოლონიაში უნდა გაატაროს ან საერთოდ განადგურდეს", _ განაცხადა კადიროვმა.
შეგახსენებთ, რომ გამოძიების ფედერალურ ბიუროს დოკუ უმაროვი მსოფლიოს ყველაზე საშიში ტერორისტების ათეულში ჰყავს შეყვანილი. სწორედ დოკუ უმროვმა აიღო თავის თავზე "დომოდედოვოს" აეროპორტში მომხდარი ტერაქტის განხორციელება.