აშშ-ს პრეზიდენტი ბარაკ ობამა არ ამართლებს იმ მეთოდებს რა მეთოდებითაც ლიბიელი ამბოხებულები მუამარ კადაფს გაუსწორდნენ, თუმცა მიიჩნევს, რომ მისი სიკვდილი სხვა დიქტატორებისათვის გაკვეთილი უნდა იყოს, „იმისათვის რათა მათ გაიგონ, რომ პატივი უნდა სცენ ადამიანის უფლებებს და საკუთარი ხალხის მისწრაფებებს". ეს განცხადება აშშ-ს პრეზიდენტმა ტელეკომპანია "ენ-ბი-სი"-სთან საუბარში გააკეთა.
"ე.წ. არაბული გაზაფხულის დროს მას ჰქონდა საშუალება მმართველობის ფორმები შეერბილებინა და ქვეყნის მართვა დემოკრატიულ ფორმაზე გადაეყვანა. ჩვენ მას საკმარისი საშულება მივეცით იმისათვის, რომ ეს გაეკეთებინა, მაგრამ მან ეს არ გააკეთა", _ განაცხადა ობამამ და აღნიშნა, რომ ალბათ არც არავის მოეწონა ის დასასრული, რა დასასრულითაც კადაფმა დაასრულა თავისი სიცოცხლე.
"მაგრამ მიმაჩნია, რომ მისი სიკვდილი არის ძლიერი სიგნალი მთელს მსოფლიოში მყოფი დიქტატორებისათვის, იმისა, რომ მათ ადამიანის უფლებებსა და თავისუფლებებს პატივი უნდა სცენ ", - აცხადებს ბარაკ ობამა.
შეგახსნებთ, რომ ლიბიის ლიდერი, რომელიც ქვეყანას 42 წლის განმავლობაში მართავდა 20 ოქტომბერს თავის მშობლიურ ქალაქ სირტში მოკლეს. ამის შემდეგ მუამარ კადაფის ცხედარი ქალაქ მისურატაში ცენტრალური სუპერმარკეტის მაცივარში გამოფინეს და ოთხი დღის განმავლობაში მოსახლეობას მისი ხილვის საშუალება მისცეს.

კადაფი გუშინ უდაბნოში საიდუმლო ადგილზე დაკრძალეს.