ლიბიის მოკლული ლიდერის მუამარ კადაფის ოჯახის წევრები ჰააგის ადამიანის უფლებათა დაცვის სასამართლოში სარჩელის შეტანას აპირებენ. მათი ადვოკატის მარსელ სესსალდის განცხადებით, საქმე ეხება იმ სამხედრო დანაშაულს, რომელიც მათი აზრით არის ლიბიელი ლიდერის მკვლელობა. ინფორმაციას ამის შესახებ ფრანგული რადიოსადგური "ევროპა1" ავრცელებს.
"ნათესავები ჰააგის სასამართლოში სარჩელის შეტანას აპირებენ, ვინაიდან მათთვის ცნობილია ის გარემოებები, რომლებშიც მუამარ კადაფი დაიღუპა. მათი თქმით, ნატოს სამხედრო ვერტმფრენებმა ცეცხლი გახსნეს იმ კორტეჟის მიმართულებით, რომელშიც მუამარ კადაფი იმყოფებოდა. ეს კორტეჟი მშვიდობიან მოსახლეობას არავითარ საფრეთხეს არ უქმნიდა. ეს იყო ჩრდილოატლანტიკური ალიანსის მიერ დაგეგმილი ოპერაცია, რომელიც მუამარ კადაფის ლიკვიდაციას ისახავდა მიზნად", _ აცხადებს ადვოკატი და აღნიშნავს, რომ ასევე აღმაშფოთებელია ის ფაქტი, თუ როგორ ექცეოდნენ ლიბიის ლიდერს მისი ტყვედ ჩაგდების შემდეგ.
შეგახსნებთ, რომ ლიბიის ლიდერი, რომელიც ქვეყანას 42 წლის განმავლობაში მართავდა 20 ოქტომბერს თავის მშობლიურ ქალაქ სირტში მოკლეს. ამის შემდეგ მუამარ კადაფის ცხედარი ქალაქ მისურატაში ცენტრალური სუპერმარკეტის მაცივარში გამოფინეს და ოთხი დღის განმავლობაში მოსახლეობას მისი ხილვის საშუალება მისცეს. კადაფი გუშინ უდაბნოში საიდუმლო ადგილზე დაკრძალეს.
