რესპუბლიკელი ჯონ ბეინერი, რომელიც აშშ-ს კონგრესის ქვედა პალატას ხელმძღვანელობს რუსეთთან არსებული "გადატვირთვის" პოლიტიკის მკაცრი კრიტიკით გამოვიდა და განაცხადა, რომ იგი აშშ-ს ინტერესებსა და ფასეულობებს ეწინააღმდეგება.
მისივე თქმით, რუსული მხარის რეაქცია "გადატვირთვაზე" სულაც არ უშლის ხელს მცდელობებს "აღადგინოს საბჭოთა კავშირის გავლენა და ძლიერება".
მანვე მოუწოდა აშშ-ს პრეზიდენტს ბარაკ ობამას გადახედოს რუსეთთან ურთიერთობებს, იმის ფონზე, რომ პრემიერ-მინისტრი ვლადიმერ პუტინი კვლავ კრემლში საპრეზიდენტო სავარძელში დაბრუნებას აპირებს.
კერძოდ, ბეინერმა განაცხადა, რომ აშშ-მ მხარი არ უნდა დაუჭიროს რუსეთის ვაჭრობის მსოფლიო ორგანიზაციაში გაწევრიანებას, ვიდრე მოსკოვი თბილისთან აფხაზეთსა და ე.წ. სამხრეთ ოსეთთან მიმართებაში ტერიტორიულ დავას არ დაარეგულირებს.
მან ასევე მოუწოდა თეთრ სახლს უფრო აქტიური ღონისძიებები გაატაროს იმისათვის, რომ აიძულოს რუსეთი შეწყვიტოს ირანთან თანამშრომლობა, განსაკუთრებით ბირთვული და სარაკეტო ტექნოლოგიების სფეროში და ადამიანის უფლებების დაცვას მიხედოს.
"აშშ-მ დაჟინებით უნდა მოითხოვოს, რომ რუსეთმა თავისი საკუთარი პოლიტიკა "გადატვირთოს" და თუკი ამისათვის კბილების გამოჩენა იქნება საჭირო, წარმომადგენელთა პალატა მზადაა ყველა აუცილებელ ზომას მხარი დაუჭიროს", _ განაცხადა კონგრესის ყველაზე გავლენიანმა რესპუბლიკელმა და აღნიშნა, რომ მალე რუსეთს სათავეში ჩაუდგება ადამიანი, რომელიც "საბჭოთა დროის მიმართ თავისი ნოსტალგიითაა ცნობილი".
მისივე თქმით, მას შემდეგ რაც ბარაკ ობამა ხელისუფლების სათავეში მოვიდა ანუ სამი წლის განმავლობაში, კრემლმა მხოლოდ მოიგო აშშ-ს ყველას მცდელობისგან დაარეგულიროს ურთიერთობა რუსეთთან. ამასთან ერთად, მოსკოვი აგრძელებს "თავისი ფიზიკური, პოლიტიკური და ეკონომიკური ბერკეტებისა და ბუნებრივი რესურსების გამოყენებას არასტაბილურ და საფრთის შემცველ რეჟიმებთან კეკლუცისათვის".
"ახლა კი როდესაც ვლადიმერ პუტინი კვლავ კრელმში დაბრუნებას აპირებს, მოვიდა დრო დავსვათ კითხვა - აპირებს თუ არა ბარაკ ობამას ადმინისტრაცია რუსეთთან თავისი პოლიტიკის გადახედვას", _ განაცხადა ბეინერმა.
