თბილისის მერი საბავშვო ბაგა-ბაღების მასწავლებლებსა და მშობლებს შეხვდება. გიგი უგულავა მათ მიმდინარე სასწავლო წელს საბავშვო ბაღებში განხორციელებულ რეფორმებსა და სამომავლო გეგმებზე გაესაუბრება, რომლებიც ბავშვების განვითრების ხელშეწყობასა და პედაგოგებისთვის სამუშაო გარემოს გაუმჯობესებას ისახავს მიზნად.
საბავშვო ბაღების მეთოდოლოგიური და ადმინისტრაციული მართვის გაუმჯობესების მიზნით, 2011 წლის ზაფხულში არასამეწარმეო, არაკომერციული იურიდიული პირი - თბილისის საბავშვო ბაღების სააგენტო შეიქმნა, რომელთანაც თბილისის მერია აქტიურად თანამშრომლობს. საბავშვო ბაღების სააგენტო თბილისელებს საერთაშორისო სტანდარტების შესაბამის, ახალი მეთოდოლოგიით სწავლებასა და გაუმჯობესებულ მომსახურეობას სთავაზობს.
საბავშვო ბაღების სააგენტოს ინიციატივით, ახალი სასწავლო წლიდან ბაგა-ბაღებში აღზრდა-განათლების პროცესი ახალი პროგრამით მიმდინარეობს. გაეროს ბავშვთა ფონდის დახმარებით, შეიქმნა ახალი ყოველდღიური პროგრამა, რომელიც ბავშვის განვითარების სტანდარტებს ეფუძნება და აღსაზრდელების სოციალური, ემოციური, მეტყველების, ფიზიკური და შემოქმედებითი უნარების განვითარებას ისახავს მიზნად.
პროგრამა მთელი წლის განმავლობაში გაივლის პილოტირებას, სასწავლო წლის ბოლოს კი პროგრამის დანერგვის საკითხებზე თბილისის ყველა ბაღის დირექტორსა და მეთოდისტს ჩაუტარდება ტრეინინგი, თუ როგორ უნდა განხორციელდეს ის ეფექტურად.
თბილისის ბაგა-ბაღების რეფორმის ფარგლებში, სკოლამდელი აღზრდის დაწესებულების სისტემისა და მომსახურების განვითარებისთვის, მერიის ინიციატივით, ასევე შეიქმნა დოკუმენტი - "ბაგა-ბაღების მართვის სტრატეგია".
სტრატეგიის მიზანი სკოლამდელი აღზრდის დაწესებულებებში ბავშვის უფლებებსა და ინტერესებზე ორიენტირებული გარემოს შექმნაა. დოკუმენტი არეგულირებს ისეთ საკითხებს, როგორიცაა ბავშვის განვითარებისა და ჯანმრთელობისათვის საჭირო დოკუმენტაცია, კვება, ჰიგიენა, ჯანმრთელობის დაცვა, შეზღუდული შესაძლებლობის მქონე ბავშვთა ინკლუზია, ოჯახის მონაწილეობა სააღმზრდელო პroცესში, ფიზიკური და სოციალური გარემო და ა.შ დოკუმენტის ბოლო თავი ასახავს ყველა ზემოთ აღნიშნული საკითხის პრაქტიკაში განხორციელების სტრატეგიებს.
ყოველივე ამ თემებთან დაკავშირებით, გიგი უგულავა საბავშვო ბაღების მასწავლებლებსა და მშობლებს შეხვდება, გაესაუბრება და მათ მოსაზრებებს მოისმენს. თბილისის მერი პედაგოგებს მათი სახელფასო განაკვეთის გაზრდის შესახებ, მიღებულ გადაწყვეტილებასაც გააცნობს.
