ლიბიის გარდამავალი საბჭოს თავმჯდომარე მაჰმუდ ჯაბრაილი თანამდებობას ტოვებს. ინფორმაციას ამის შესახებ სააგენტო "როიტერი" ავრცელებს.
მისი განცხადებით, მისი გადადგომა გეგმის მიხედვით ხორციელდება და ხდება მაშინ, როდესაც არმიამ მთელი ქვეყანა დაიკავა. ქვეყანაში ბოლო დრომდე იყო რაიონები, სადაც ლიბიის გარდაცვლილი ლიდერის მუამარ კადაფის მომხრეები იბრძოდნენ და დანებებას არ აპირებდნენ.
მოსალოდნელია, რომ ლიბიამ ხვალ ოფიციალური განცხადება გააკეთოს ქვეყნის განთავისუფლების შესახებ. მაჰმუდ ჯაბრაილი გარდამავალ საბჭოს სათავეში მიმდინარე წლის მაისში ჩაუდგა. სწორედ იმ დროიდან საბჭომ თავისი თავი კი ლიბიაში არსებულ ერთადერთ კანონიერ ორგანოდ გამოაცხადა.
ლიბიაში არჩევნები 8 თვეში უნდა დაინიშნოს, რომლებზეც ქვეყნის მოსახლეობა ნაციონალურ საბჭოს აირჩევს. ნაციონალური საბჭოს არჩევის შემდეგ კი დაიწერება ლიბიის კონსტიტუცია და დროებითი მთავრობა ჩამოყალიბდება, რომელიც თავის მხრივ, სავარაუდოდ იქამდე იმოქმედებს, ვიდრე საპრეზიდენტო არჩევნები არ ჩატარდება.
