თუ ბიძინა ივანიშვილი საქართველოს მოქალაქე არ არის, მას არ აქვს უფლება საქართველოს საპარლამენტო არჩევნებში მიიღოს მონაწილეობა, - ამის შესახებ "ჯი-ეიჩ-ენს" ექსპერტმა სამართლებრივ საკითხებში, იურისტმა კახა ასლანიშვილმა განუცხადა.
"მისი საპარლამენტო არჩევნებში მონაწილეობა წინააღმდეგობაში მოვა საქართველოს კონსტიტუციასთან, ასევე "მოქალაქეობის შესახებ საქართველოს კანონის". გარდა, რასაკვირველია, იმ შემთხვევისა, თუ მას არ სურს არაპირდაპირად მონაწილეობა. მაგალითად, "პოლიტიკური გაერთიანებების შესახებ საქართველოს კანონის" თანახმად, იყოს დამფინანსებელი, ან შემომწირველი კონკრეტული პოლიტიკური სუბიექტის. მაგრამ, უშუალოდ მისი მონაწილეობა არ შეიძლება", - განაცხადა "ჯი-ეიჩ-ენთან" საუბარში ასლანიშვილმა და აღნიშნა, მას კანონი ასევე არ აძლევს უფლებას დააფუძნოს პოლიტიკური პარტია.
მისი თქმით, თუ საქართველოს მოქალაქე ხარ და იღებ სხვა ქვეყნის მოქალაქეობას , ამ შემთხვევაში საქართველოს მოქალაქეობას კარგავ.
"თუ იმ ქვეყანამ არ მოგთხოვა გაცვლა, რომლის მოქალაქოებასაც ითხოვ, საქართველოს ჩვენი ქვეყნის კანონმდებლობა ორმაგ მოქალაქეობას არ უშვებს. ანუ, თუ პირი იღებს სხვა ქვეყნის მოქალაქეობას, მას საქართველოს მოქალაქეობა უწყდება. ორმაგ მოქალაქეობას არც საქართველოს კონსტიტუცია უშვებს, გარდა იმ შემთხვევისა, როდესაც უცხო ქვეყნის მოქალაქეს ქვეყნის წინაშე დამსახურებისთვის საქართველოს პრეზიდენტის ანიჭებს", - განაცხადა "ჯი-ეიჩ-ენთან" საუბარში ასლანიშვილმა.
შეგახსენებთ, რომ დღეს სამოქალაქო რეესტრმა განცხადება გაავრცელა ბიძინა ივანიშნილის მოქალაქეობის შესახებ. "რუსეთის ფედერაციის მოქალაქეს ბიძინა გრიგოლის ძე ივანიშვილს 2004 წლის 22 ივლისს მიენიჭა საქართველოს მოქალაქეობა.
საქართველოს კონსტიტუციის და „საქართველოს მოქალაქეობის შესახებ" საქართველოს ორგანული კანონის 32-ე მუხლის მიხედვით, საქართველოს მოქალაქის მიერ სხვა სახელმწიფოს მოქალაქეობის მიღება იწვევს საქართველოს მოქალაქეობის დაკარგვას.
სამოქალაქო რეესტრის სააგენტოს მიერ „საქართველოს მოქალაქეობის შესახებ" საქართველოს ორგანული კანონის შესაბამისად, ჩატარდა წარმოება და დადგინდა, რომ ბიძინა ივანიშვილმა 2004 წელს საქართველოს მოქალაქეობის მიღების შემდეგ მოიპოვა საფრანგეთის რესპუბლიკის მოქალაქეობა.
აღნიშნული გარემოებებიდან გამომდინარე, საქართველოს კონსტიტუციისა და „საქართველოს მოქალაქეობის შესახებ" საქართველოს ორგანული კანონის მოთხოვნათა გათვალისწინებით, ბიძინა ივანიშვილს შეუწყდა საქართველოს მოქალაქეობა", - აღნიშნულია განცხადებაში.
შეგახსენებთ, რომ ბიძინა ივანიშვილი 2012 წლის საპარლამენტო არჩევნებში მონაწილეობის მიღებას აპირებს.
