ქობულეთის რაიონის სოფლების - აჭყვისთავის, ხუცუბნის, დაგვის, ჩაქვის, ბუკნარის, სოფელქობულეთის და ციხისძირის მოსახლეობამ "ქრისტიან-დემოკრატებს" ციტრუსის მოსავლის აღება-გასაღების პრობლემის მოგვარება სთხოვა.
სოფლების წარმომადგენლები დღეს ქდმ-ს ქობულეთის ორგანიზაციაში მივიდნენ და არსებულ პრობლემებზე ისაუბრეს.
ორგანიზაციის ხელმძღვანელის, თამაზ ბაკურიძის განცხადებით, რეგიონის ხელისუფლება მზად არ არის მოსავლის აღება-დაბინავებისა და გასაღების პრობლემები გადაწყვიტოს.
„გასულ წელთან შედარებით მოსალოდნელია, რომ მოსავალი გაცილებით მეტი იქნება, ამ ეტაპზე კი არ არის შესაბამისი რაოდენობის ყუთების მარაგი, არ მოგვარებულა ე.წ. არასტანდარტული ციტრუსის ჩაბარების პრობლემა, შეფერხებულია პროდუქციის რეგიონის გარეთ გატანაც, რადგან სფერო მონოპოლიზებულია, ფასები კი - გაზრდილი "- აცხადებს ბაკურიძე.
მისივე ინფორმაციით, რამდენიმე წლის წინ ქობულეთში პომპეზურად გახსნილი ქარხანა, რომელსაც პრეზიდენტიც დაესწრო, უკვე დაიხურა და ერთი სეზონიც არ უმუშავია.
„ქრისტიან-დემოკრატები" ციტრუსის მოსავლის აღებაზე მონიტორინგის დაწესებას და ხელისუფლებისთვის კონკრეტული რეკომენდაციების შეთავაზებას გეგმავენ.
