აზერბაიჯანი ყოველთვის მხარს უჭერდა თურქეთს, როგორც საერთაშორისო ისე იმ რეგიონალურ საკითხებში, რომლებიც სამხრეთ კავკასიას ეხება. ეს განცხადება აზერბაიჯანის პრეზიდენტის ადმინისტრაციის საზოგადოებრივ-პოლიტიკური საკითხების განყოფილების უფროსმა ალი ჰასანოვმა გააკეთა. მანვე საფრანგეთის პრეზიდენტის ნიკოლა სარკოზის მიერ სომხეთში გაკეთებული განცხადებების კომენტირებისას, რომლებიც თურქეთის მხრიდან სომხების გენოციდის განხორციელების ფაქტის აღიარებას ეხება, განაცხადა, რომ აზერბაიჯანი ამ განცხადებებს მხარს არ უჭერს.
"როგორც ე.წ. სომხების გენოციდის, ისე საზღვრების გახსნის საკითხებში აზერბაიჯანისა და თურქეთის შეხედულებები ერთმანეთს ემთხვევა", _ განაცხადა ჰასანოვმა.
შეგახსენებთ, რომ სოხეთში ვიზიტის დროს საფრანგეთის პრეზიდენტმა ნიკოლა სარკოზიმ განაცხადა, რომ იმ შემთხვევაში თუ თურქეთი სომხების გენოციდის ფაქტს უახლოეს მომავალში არ აღიარებს, მაშინ შესაძლოა საფრანგეთმა მიიღოს კანონი, რომლის მიხედვითაც გენოციდის არ აღიარება დანაშაულად ჩაითვლება.
