მილიარდერი ბიძინა ივანიშვილი, რომელმაც პოლიტიაში ჩაბრთვის გადაწყვეტილების შესახებ განცხადება გაავრცელა თავისი გადაწყვეტილების მიზეზად პრეზიდენტ მილეილ სააკაშვილის მიერ ხელისუფლების ტოტალურ მონოპოლიზირებას და საკონსტიტუციო ვადის ამოწურვის სემდეგ ძალაუფლების შენარჩუნების სურვილს ასახელებს.
„მიხეილ სააკაშვილის მიერ ხელისუფლების ტოტალურმა მონოპოლიზებამ და ჩატარებულმა კონსტიტუციურმა ცვლილებებმა, რომელთა მიხედვითაც ნათლად ვლინდება სააკაშვილის სურვილი, ყველანაირი კონსტიტუციური ვადის ამოწურვის მიუხედავად, შეინარჩუნოს ძალაუფლება და დარჩეს ხელისუფლების სათავეში, მიმაღებინა გადაწყვეტილება, შევქმნა პოლიტიკური პარტია და მონაწილეობა მივიღო 2012 წლის საპარლამენტო არჩევნებში", - აცხადებს ივანიშვილი.
მისი თქმით, სააკაშვილის მმართველობის დროს დაშვებული იყო მიუტევებელი შეცდომები.
„სააკაშვილის მმართველობის დროს დაშვებული იყო (და დღემდე გრძელდება) ისეთი უამრავი პატარა, დიდი და მიუტევებელი შეცდომები, რომ მის ადგილზე ნებისმიერი საღად მოაზროვნე და გონიერი პოლიტიკოსი ვადაზე ადრე წავიდოდა პოლიტიკიდან და პატიებას სთხოვდა თავის ხალხს", _ ნათქვამია ივანიშვილის მიერ გაკეთებულ განცხადებაში.
ბიძინა ივანისვილი მიიჩნევს, რომ პოლიტიკოსი, რომელიც პატივს სცემს საკუთარ ქვეყანას, თავის ხალხს ან ელემენტარული თავმოყვარეობა მაინც გააჩნია, გააცნობიერებდა, რომ ლეგიტიმური გზით პოლიტიკაში დარჩენა შეუძლებელია და არ შეეცდებოდა კანონიერების ჩანაცვლებას: პირველი _ ძალადობით და მეორე _ სიცრუით.
