ქართველები მადლიერებასა და იმედგაცრუებას შორის მერყეობენ; სარკოზის ახალი "გაყინული კონფლიქტისთვის" თავის არიდება სურს, - ნათქვამია Reuters-ის სტატიაში , რომელსაც Les Echos-ი აქვეყნებს. სტატიის ქართულ ვერსიას "ფორინპრესი" ავრცელებს.
Reuters-ი წერს, რომ ხუთშაბათს და პარასკევს ნიკოლა სარკოზი კვლავ კავკასიურ ქვაბში აღმოჩნდება, როდესაც ერევანს, ბაქოს და თბილისს ეწვევა. კავკასიური ტურნე სამი წლის შემდეგ შედგება მას მერე, რაც საფრანგეთის პრეზიდენტმა რუსეთ-საქართველოს ომში შუამავლის როლი ითამაშა.
"არჩევნებამდე შვიდი თვით ადრე სარკოზი კვლავ მშვიდობისმყოფელის სამოსს მოირგებს, იმ ფონზე, როდესაც საფრანგეთმა წამყვანი როლი ითამაშა ლიბიაში, მუამარ კადაფის რეჟიმის დამხობაში და ახლო აღმოსავლეთში დიალოგის განახლების წინადადებით გამოვიდა. ქართველი დიპლომატები ამტკიცებენ, რომ პარასკევს საქართველოს დედაქალაქში სარკოზის, როგორც გმირს ისე დახვდებიან, მიუხედავად იმისა, რომ ეს ყოფილი საბჭოთა რესპუბლიკა (69,7 ათასი კვ.კმ-ის მოცულობის და 4,4 მილიონი მცხოვრებლით, რომელთაგან 90%-ზე მეტი ქრისტიანია) აშკარად იმედგაცრუებულია. რუსეთი არათუ დაბრუნდა იმ პოზიციებზე, რომელიც ე.წ. სამხრეთ ოსეთის და აფხაზეთის გამო 2008 წლის აგვისტოში დაწყებულ ომამდე ეკავა, არამედ ცალმხრივ რეჟიმში ამ ქართული რეგიონების დამოუკიდებლობა აღიარა და თითქმის გააორმაგა იქ საკუთარი სამხედროების რიცხვი, იუწყება ევროპული წყარო", - წერს Reuters-ი.
სტატიაში ნათქვამია, რომ სარკოზის მიერ შედგენილი 2008 წლის 12 აგვისტოს სამშვიდობო გეგმის ინტერპრეტაცია, რომლის მიზანიც ოსეთში ქართულ შეტევაზე რუსეთის პასუხის აღკვეთა იყო, მოსკოვსა და თბილისში სხვადასხვაგვარად ხდება.
"საქართველო აღშფოთებული იყო ასევე რუსეთისთვის ოთხი ფრანგული ვერტმფრენმზიდის "მისტრალის" მიყიდვის ფაქტზე. რა თქმა უნდა, წყენა არსებობდა, მაგრამ ჩვენ გვესმის, რომ სჯობს საფრანგეთმა რუსეთთან იმეგობროს, რომ ვიღაც მაინც შუამავალი იყოს, - აღნიშნავს ქართველი დიპლომატი და დასძენს, რომ ქართველი ხელმძღვანელები არ აპირებენ საფრანგეთის პრეზიდენტისთვის "უსიამოვნო რაღაცეების" შეხსენებას, რადგან "მან გააკეთა ის, რაც შეეძლო". საზღვრისპირა რეგიონებში არეულობა გრძელდება, ჟენევის მოლაპარაკებები ე.წ სამხრეთ ოსეთის და აფხაზეთის მომავალზე ჩიხში მოექცა, რუსეთის და საქართველოს პოლიტიკოსები განაგრძობენ ერთმანეთის შეურაცხყოფას და მორიგების გზებს არ განიხილავენ", - ნათქვამია სტატიაში.
სტატიაში აღნიშულია, რომ ელისეს სასახლეში დიალოგის აღდგენის აუცილებლობაზე საუბრობენ და "სწორედ ამ გზავნილს ჩაუტანს ნიკოლა სარკოზი პრეზიდენტ სააკაშვილს, როგორც ეს რუსეთის ლიდერების შემთხვევაში გააკეთა. ჩვენ დარწმუნებულები ვართ, რომ არ ღირს სტატუს-ქვოს მხარდაჭერა და ამით კიდევ ერთი გაყინული კონფლიქტის შექმნა. სინამდვილეში, ჩვენ მიგვაჩნია, რომ რისკი არსებობს", - ამბობს წყარო.
ქართველი დიპლომატის თქმით კი, თბილისს უნდა, რომ სარკოზიმ "მკაფიოდ და მტკიცედ" განაცხადოს, რომ რუსეთი არ ასრულებს 2008 წლის 12 აგვისტოს სამშვიდობო შეთანხმებას, და კიდევ ერთხელ დაადასტუროს ის, რომ მხარს უჭერს საქართველოს ტერიტორიულ მთლიანობას. მართალია, ქართველებს უარის თქმა მოუწიათ ნატო-სა და ევროკავშირში სწრაფ გაწევრიანებასთან დაკავშირებულ იმედებზე, თუმცა ისინი მისგან მხარდაჭერას მაინც ელიან. ნიკოლა სარკოზი საქართველოს "ევროპულ ორიენტაციას გაითვალისწინებს", - ამტკიცებენ ელისეს სასახლეში", - აღნიშნულია სტატიაში.
თბილისამდე სარკოზი 24-საათიანი ვიზიტით სომხეთს ეწვევა და ბაქოში, აზერბაიჯანის პრეზიდენტ ილჰამ ალიევთან ერთად ისადილებს.
"ერევანში, იმ ქვეყნის დედაქალაქში, რომლის ტერიტორიაც 29 000 კვ.კმ-ია , ხოლო მოსახლეობა 3,2 მილიონ ადამიანს შეადგენს (მათგან 94% ორთოდოქსი ქრისიტიანია) სარკოზის დელეგაციაში იქნებიან საფრანგეთის სომხური დიასპორის ორი ცნობილი წარმომადგენელი - მომღერალი შარლ აზნაური და ყოფილი მინისტრი პატრიკ დევეჯიანი. ეს ერთგვარი ჟესტია იმ 500 000 ფრანგი სომეხის მიმართ, რომლებიც იმედგაცრუებულნი იყვნენ სენატის უარით კანონპროექტის მიღებაზე, რომელიც მიმართული იყო 1915 წელს თურქების მხრიდან სომხების მიმართ ჩადენილი გენოციდის უარყოფის წინააღმდეგ. რუსეთის და საქართველოს შემთხვევის მსგავსად, სარკოზი შეეცდება მყიფე დიპლომატიური წონასწორობის დაცვას და თურქეთის წყენისთვის თავის არიდებას, თურქეთის, რომლის გავლენაც ევროპის საზღვრებთან სულ უფრო იზრდება. მიუხედავად ამისა, ხუთშაბათს ის ერევნის გენოციდის მუზეუმს მაინც მოინახულებს", - წერს Reuters-ი.
სტატიაში აღნიშნულია, რომ რეგიონში მოგზაურობა აზერბაიჯანში შევლის გარეშე არ შეიძლება.
"საფრანგეთი ეუთო-ს მინსკის ჯგუფის ერთ-ერთი თანათავმჯდომარეა. ეს ჯგუფი მთიანი ყარაბაღის კონფლიქტში შაუამავალია. ელისეს სასახლეში ამბობენ, რომ მან მტკიცედ მიმართა სომხეთის და აზერბაიჯანის ხელისუფლებას და კომპრომისის ძიებაში გახსნილობისკენ მოუწოდა. ქვეყანაში არსებული ავტორიტარული რეჟიმის მიუხედავად, ნახშირწყალბადით მდიდარი აზერბაიჯანი ეკონომიკური ზრდის ჩინურ ტემპებს ავლენს და ეკონომიკური და სტრატეგიული თვალსაზრისით ყოფილი სსრკ-ს ამ სამი რესპუბლიკიდან, რომელსაც საფრანგეთის ლიდერი ეწვევა, უმნიშვნელოვანესია. ირანთან მოსაზღვრე ამ ქვეყანაში, რომლის ტერიტორიაც 86 600 კვ.კმ, ხოლო მოსახლეობის რიცხვი 8,4 მილიონი (აქედან 94% მუსულმანია) რუსეთის რადარია განთავსებული. მოსკოვი ევროპაში ნატო-ს ანტისარაკეტო სისტემის პროექტში ამ რადარის ჩართვის წინადადებით გამოდის", - ნათქვამია სტატიაში.
საფრანგეთის ნავთობკომპანია Total ყოველდღიურად 13 000 ბარელ ნავთობის ექვივალენტს მოიპოვებს შაჰ-დენიზის გაზის საბადოზე. კომპანიამ 9 სექტემბერს განაცხადა, რომ კასპიის ზღვაში ბაქოს სამხრეთ-აღმოსავლეთით გაზის მნიშვნელოვანი მარაგები აღმოაჩინა.
ელისეს სასახლეში აცხადებენ, რომ პრეზიდენტის ვიზიტი სერიოზული სტიმული გახდება მთელი რიგი მოლაპარაკებებისთვის და, შესაძლოა, მას პრეზიდენტ ილჰამ ალიევისგან ფრანგულ კომპანიებთან თანამშრომლობის გადაწყვეტილების დადასტურება მოჰყვეს.