"საქსტატის" ინფორმაციით, 2011 წლის სექტემბერში 2010 წლის სექტემბერთან შედარებით ინფლაციის დონემ საქართველოში 4,6 პროცენტი შეადგინა.
სტატისტიკის ეროვნული სამსახურში აცხადებენ, რომ 12-თვიან პერიოდში აღნიშნული მაჩვენებლის ფორმირებაში ძირითადი გავლენა იქონია ფასების
ცვლილებამ სურსათისა და უალკოჰოლო სასმელების ჯგუფზე. კერძოდ, მოცემულ პერიოდში ფასები გაიზარდა 5,8 პროცენტით და
ჯგუფის წვლილმა წლიური ინფლაციის საერთო მაჩვენებელში 2,5 პროცენტული პუნქტი შეადგინა. ფასების ზრდის მაღალი მაჩვენებლები დაფიქსირდა ხორცსა და ხორცის პროდუქტების ქვეჯგუფზე (24,9 პროცენტი), შაქარსა და ტკბილეულობის ქვეჯგუფზე (15,7 პროცენტი), რძე, ყველი და კვერცხის ქვეჯგუფზე (11,2 პროცენტი), ზეთი და ცხიმის ქვეჯგუფზე (8,1 პროცენტი), პური და პურპროდუქტების ქვეჯგუფზე (6,2 პროცენტი).
ფასების კლება დაფიქსირდა შემდეგ ქვეჯგუფებზე: ბოსტნეულსა და ბაღჩეულზე (14,1 პროცენტი), ხილსა და ყურძენზე (6,2 პროცენტით).
ანალოგიურ პერიოდში გაიზარდა ასევე ტრანსპორტის ფასევიც. "საქსტატის" ინფორმაციით, ფასები გაიზარდა 17,3 პროცენტით. შესაბამისად, ჯგუფის წვლილმა წლიური ინფლაციის საერთო მაჩვენებელში 1,7 პროცენტული პუნქტი შეადგინა. აღნიშნულ ჯგუფში ფასების მნიშვნელოვანი მატება დაფიქსირდა: სატრანსპორტო მომსახურების ქვეჯგუფზე (23,8 პროცენტი) და
საწვავის ქვეჯგუფზე (17,3 პროცენტი).
2011 წლის სექტემბერში 2010 წლის სექტემბერთან შედარებით ფასების 7,6 პროცენტიანი კლება დაფიქსირდა კავშირგაბმულობის ჯგუფზე, რომლის წვლილმაც ინფლაციის საერთო მაჩვენებელში -0,3 პროცენტული პუნქტი შეადგინა