აჭარაში განხორციელებული ინვესტიციების მოცულობა იზრდება. როგორც სააგენტო "ჯი-ეიჩ-ენს" აჭარის ფინანსთა და ეკონომიკის სამინისტროში განუცხადეს, 2011 წლის იანვარ-სექტემბერში რეგიონში 111 მლნ. დოლარის ინვესტიცია განხორციელდა, რაც 20,8 -ით მეტია გასული წლის ანალოგიურ პერიოდში განხორციელებულ ინვესტიციებთან შედარებით. სტატისტიკური ინფორმაციის მიხედვით, 2010 წლის იანვარ-სექტემბერში აჭარაში ეკონომიკის სხვადასხვა დარგში 91,9 მლნ. დოლარის ინვესტირება მოხდა.
აჭარის ფინანსთა და ეკონომიკის სამინისტროს ინფორმაციით, 2011 წლის იანვარ-სექტემბერში განხორციელებული ინვესტიციებიდან 45 მლნ. დოლარი ადგილობრივ, ხოლო 66 მლნ. უცხოურ ინვესტიციებზე მოდის.
სტატისტიკის მიხედვით, 2011 წლის იანვარ-სექტემბერში ყველაზე დიდი რაოდენობით ინვესტიცია, გასული წლების მსგავსად, ტურიზმის სექტორში განხორციელდა, სულ 52,5 მლნ. დოლარი. ასევე მზარდი აღმოჩნდა მშენებლობის დარგი, სადაც ცხრა თვეში 34,5 მლნ. დოლარია ინვესტირებული, მრეწველობაში კი 21 მლნ. დოლარი, ხოლო რაც შეეხება ტრანსპორტსა და კავშირგაბმულობის სექტორს, ამ დარგებში ინვესტიციის მოცულობამ 1,5 მლნ დოლარი შეადგინა. ამავე რაოდენობით ინვესტიცია განხორციელდა, ეკონომიკის სხვა დარგებშიც.