"ქრისტიან-დემოკრატების" ლიდერი გიორგი თარგამაძე, ოპოზიციის სხვა ლიდერებთან ერთად, დღეს აშშ-ს სახელმწიფო დეპარტამენტის კავკასიის საქმეთა და რეგიონული კონფლიქტების ოფისის დირექტორს ჯასტინ ფრიდმანს შეხვდა. საუბრის მთავარი თემა 2012-13 წლების არჩევნები და საარჩევნო გარემოს გაუმჯობესებისთვის გადასადგმელი ნაბიჯები იყო.
შიდაპოლიტიკური საკითხების გარდა, გიორგი თარგამაძე სხვა აქტუალურ თემებს შეეხო. უმცირესობის ლიდერმა სტრატეგიული ობიქტების, მათ შორის - გაზსადენისა და საქართველოს რკინიგზის შესაძლო გასხვისებასთან დაკავშირებით მთავრობის პოზიციაზე ისაუბრა.
„ამ საკითხთან დაკავშირების ხელისუფლების პოზიცია ჩვენ არაერთხელ გავაკრიტიკეთ. ამჯერად ბატონი ფრიდმანის მეშვეობით ვთხოვეთ სახელმწიფო დეპარტამენტს დაარწმუნოს საქართველოს მთავრობა კანონმდებლობაში ჩაიდოს გარანტიები სტრატეგიული ობიექტების საკონტროლო პაკეტის გაყიდვის დაუშვებლობის შესახებ. მიგვაჩნია, რომ ეს სასიცოცხლოდ მნიშვნელოვანია როგორც ქვეყნის უსაფრთხოების, ისე სატრანზიტო ფუნქციის ქმედუნარიანობისთვის" - განაცხადა თარგამაძემ.
„ქრისტიან-დემოკრატების" ლიდერმა სტუმარს მადლობა გადაუხადა საქართველოს მთავარი პარტნიორის, აშშ-ს მხრიდან ტერიტორიული მთლიანობისა და დემოკრატიული რეფორმების მხარადაჭერისთვის.
