თბილისიდან მესტიის მიმართულებით "ATR" თვითმფრინავი იფრენს. ეკონომიკისა და მდგრადი განვითარების სამინისტროს იფორმციით, თბილისიდან მესტიის მიმართულებით უკვე შედგა ფრანგული ავიამშენებელი კომპანიის "ATR" თვითმფრინავის საცდელი გაფრენა, რომელსაც მინისტრი ვერა ქობალია, მინისტრის მოადგილე გიორგი კარბელაშვილი და ფრანგული კომპანიის წარმომადგენლები დაესწრნენ.
"ATR"-ის თვითმფრინავი 50 ადამიანზე, ანუ მგზავრების გაცილებით მეტ რაოდენობაზეა გათვლილი, ვიდრე კანადური წარმოების თვითმფრინავი, რომელიც დღესდღეობით მესტიის მიმართულებით ასრულებს რეისებს. როგორც ამასთან დაკავშირებით ეკონომიკისა და მდგრაგი განვითარების მინისტრმა განაცხადა, უკანასკნელი 3 თვის განმავლობაში გამოჩნდა ტურისტთა დიდი ინტერესი სვანეთის მიმართ, შესაბამისად, ამ მოთხოვნის დასაკმაყოფილებლად თბილისიდან მესტიის მიმართულებით ყოველდღიურად 2-3 რეისი სრულდებოდა. "ამიტომ საჭირო გახდა უფრო დიდი ზომის თვითმფრინავი, რაც ამ მიმართულებით მგზავრობას გაამარტივებს", - აღნიშნა ვერა ქობალიამ.
"ATR"-ის თვითმფრინავს თბილისიდან მესტიის მიმართულებით რეისის შესასრულებლად 40 წუთი დასჭირდა. საცდელმა ფრენამ წარმატებით ჩაიარა, ასეთივე შეფასება გააკეთეს თვითმფრინავის ფრანგმა პილოტებმა. მათი განცხადებით, მესტიის თამარ მეფის სახელობის აეროპორტი ყველა საერთაშორისო სტანდარტს აკმაყოფილებს. "ATR"-ის თვითმფრინავი მესტიის მიმართულებით ფრენებს სავარაუდოდ უკვე 2-3 თვეში დაიწყებს.
ფრანგულ ავიამშენებელ კომპანიასთან თანამშრომლობის შესახებ განზრახულობათა ოქმს "საქართველოს აეროპორტების გაერთიანებამ" ხელი მოაწერა პარიზში, 22 ივნისს ლე ბურჟეს ავიაშოუს ფარგლებში. ეკონომიკისა და მდგრადი განვითარების მინისტრის მოადგილის, გიორგი კარბელაშვილის ინფორმაციით, ფრანგული "ATR"-ის მიერ წარმოებული თვითმფრინავის საცდელი ფრენების წარმატების შემთხვევაში, ის რეისებს შეასრულებს არამხოლოდ საქართველოს ქალაქებში, არამედ რეგიონის სხვა ქვეყნების მიმართულებითაც, მათ შორის: მესტია-ერევანი, მესტია-თეირანი, მესტია-თელ-ავივი, მესტია-კიევი და ა.შ. ამ ეტაპზე მოლაპარაკება მიმდინარეობს თვითმფრინავის შესყიდვის, ან იჯარით აღების თაობაზე და ზაფხულიდან უკვე შესაძლებელი იქნება ამ საერთაშორისო რეისების შესრულება.