ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა კობა სუბელიანმა სამინისტროში საფრანგეთის ელჩს ერიკ ფურნიეს უმასპინძლა. ეს გახლდათ გამოსამშვიდობებელი შეხვედრა, რადგან საფრანგეთის ელჩმა არსებული პოზიცია დატოვა და ახალ პოზიციაზე აგრძელებს მუშაობას.
საფრანგეთის ელჩმა ერიკ ფურნიემ მადლობა გადაუხადა მინისტრსა და სამინისტროს დევნილთა დასახმარებლად ღია და აქტიური თანამშრომლობისათვის და აღნიშნა, რომ გული წყდება, რადგან დევნილების საკუთარ სახლებში დაბრუნება მისი საქართველოში ელჩობის პერიოდში ვერ მოხერხდა.
ელჩმა ასევე აღნიშნა, რომ , ახალი თანამდებობის ფარგლებშიც (დირექტორატის ხელმძღვანელი „კონტინენტური ევროპის" ქვეყნების საკითხებში, რაც მოიცავს აღმოსავლეთ პარტნიორობის ქვეყნებს, რუსეთს, ბალკანეთის ქვეყნებს) არაერთხელ დაბრუნდება საქართველოში და კვლავ აქტიურად იმუშავებს სხვადასხვა, მათ შორის დევნილთა დაბრუნების საკითხზეც.
ელჩი აქტიურად არის ჩართული საფრანგეტის პრეზიდენტის ნიკოლა სარკოზის საქართველოში დაგეგმილი ვიზიტის ორგანიზებაში და სურს, ვიზიტმა ქართული საზოგადოების და მათ შორის დევნილების მოლოდინი გაამართლოს.
მინისტრმა კობა სუბელიანმა მადლობა გადაუხადა ელჩს ნაყოფიერი მოღვაწეობის, მჭიდრო თანამშრომლობისა და იმ თანადგომისთვის, რაც საფრანგეთმა ქართველი ხალხის მიმართ გასწია. განსაკუთრებულად კი აღნიშნა აგვისტოს ომის შემდგომი დახმარება დევნილებისადმი და დაზიანებული ინფრასტრუქტურის აღდგენა. მინისტრმა ასევე ისაუბრა დევნილთა განსახლების სფეროში მიღწეულ წარმატებებზე და დარჩენილ საჭიროებებზე.
სუბელიანის თქმით, 2008 წლის შედეგად იძულებით გადაადგილებულ პირთა უმრავლესობა უკვე დაკმაყოფილებულია გრძელვადიანი საცხოვრებლით, რასაც ელჩმა „ეფექტური" და „შთამბეჭდავი" უწოდა. თუმცა, მიუხედავად იმისა, რომ 90-იანი წლების რუსეთი ოკუპაციის შედეგად დევნილი მოსახლეობის ნაწილი უკვე ბინების მესაკუთრე გახდა და ნორმალურ პირობებში ცხოვრობს, ნაწილი ჯერ კიდევ ღირსეული საცხოვრებელი პირობების მოლოდინშია, რაც დაბრუნებამდე ასევე მათი ძირითადი უფლებაა. „საჭიროა, დონორების რესურსების უკეთ კოორდინირება და მობილიზება, რათა ყველა დევნილი ოჯახი საქართველოში ღირსეულ პირობებში ცხოვრობდეს" - აღნიშნა მინისტრმა.
