საქართველოს სტატისტიკის ეროვნულმა სამსახურმა საქართველოში განხორციელებული პირდაპირი უცხოური ინვესტიციების წინასწარი მონაცემები გამოაქვეყნა. "საქსტატის" წინასწარი ინფორმაციით, 2011 წლის II კვარტალში პირდაპირი უცხოური ინვესტიციების მოცულობამ 203 მლნ აშშ დოლარი შეადგინა. ეს მაჩვენებელი გასული წლის მეორე კვარტალთან შედარებით შემცირებულია - 2010 წლის მეორე კვარტალში ქვეყანაში 208 მლნ აშშ დოლარის ინვესტიცია განხორციელდა.
ინვესტიციები გაზრდილია მიმდინარე წლის პირველ კვარტალთან შედარებით - ქვეყანაში 173,7 მლნ აშშ დოლარის მოცულობის ინვესტიციები შემოვიდა.
"საქსტატის" მონაცემებით, მეორე კვარტალში ყველაზე მეტი ინვესტიცია, 52,1 მლნ აშშ დოლარი აშშ-იდან შემოვიდა, პირველ კვარტალში შტატებში 34 მლნ აშშ დოლარის ინვესტიციის გადინება მოხდა, ხოლო გასული წლის მეორე კვარტალში აშშ-დან 48,6 მლნ აშშ დოლარი შემოვიდა.
მიმდინარე წლის მეორე კვარტლის სტატისტიკით, მეორე ინვესტორი, 22,9 მლნ აშშ დოლარის ინვესტიციებით, საერთაშორისო ორაგნიზაციებია, მესამე ადგილზე 22 მლნ აშშ დოლარის პირდაპირი ინვესტიციით, თურქეთია.
მიმდინარე წლის აპრილ-ივნისში განხორციელებული ინვესტიციების 28% ტრანსპორტისა და კავშირგაბმულობის სექტორზე მოდის, 24% - უძრავი ქონების ბიზნესში ინვესტირებაზე, 17%- საფინანსო სექტორში ინვესტირებაზე, 15%- მრეწველობაში, 17%- დანარჩენ სექტორებში.