"დავით მონავარდისაშვილი ოპერისა და ბალეტის თეატრს ემსახურება ძალიან დიდი თავდადებით და მონდომებით. ბოლო 10 წლის განმავლობაში მისი შექმნილი სცენოგრაფიები ამშვენებს ოპერას. ეს არის ადამიანი, ვისი შრომის უნარიც აოცებს ყველას, ვინ მას იცნობს. მონავარდისაშვილს უმოკლეს ვადებში ურთულესი ამოცანები შეუსრულებია. რაც შეეხება ზურაბ ლომიძეს, ყველაზე რთულ პერიოდში, როდესაც ჩვენი სახელმწიფო მოშლილი იყო, მისი ძალისხმევით, ოპერა ჩვენამდე მოვიდა", - განაცხადა კულტურის მინისტრმა.

დავით მონავარდისაშვილი თბილისის ოპერისა და ბალეტის სახელმწიფო თეატრში საბალეტო სპექტაკლების სცენოგრაფიის შექმნისა და თეატრალურ მხატვრობაში მიღწეული განსაკუთრებული წარმატებებისთვის, ხოლო ზურაბ ლომიძე თბილისის ოპერისა და ბალეტის თეატრის განვითარებაში შეტანილი განსაკუთრებული წვლილისათვის დაჯილდოვდნენ.

როგორც ზურაბ ლომიძემ "ჯი-ეიჩ-ენთან" განაცხადა, ის ყოველთვის ქვეყნისთვის და ახლობლებისთვის მუშაობდა.

"მე ჩემს საქმეს ვაკეთებდი. ყველაფერს ვაკეთებდი ჩემი სამშობლოსთვის და იმ ადამიანებისთვის, ვინც მიყვარს. დიდი მადლობა იმ ადამიანებს, ვინც შრომა დამიფასა", - განაცხადა ლომიძემ.

ცერემონიას კულტურის სამინისტროს, თბილისის ზ.ფალიაშვილის სახ. ოპერისა და ბალეტის სახელმწიფო თეატრის წარმომადგენლები, მოწვეული სტუმრები დაესწრნენ, მათ შორის ნინო ანანიაშვილიც იმყოფებოდა, რომელმაც თავის თანამშრომლებს ღირსების ორდენი გულზე თავისი ხელით გაუკეთა.

"მიხარია, რომ მონავარდისაშვილი მე წავართვი მხატვრობას და სკულპტურას და წამოვიყვანე ოპერაში, იმიტომ რომ ის რასაც ჩვენ ოპერაში აკეთებს მსოფლიო მოწონებას იმსახურებს", - განაცხადა "ჯი-ეიჩ-ენთან" ნინო ანანიაშვილმა.

მონავარდისაშვილი 2004-2009 წლებში თანამშრომლობდა თბილისის ოპერისა და ბალეტის თეატრის საბალეტო დასთან. მონავარდისაშვილი არის თეატრში განხორციელებული რამდენიმე ბალეტის დამდგმელი მხატვარი. მათ შორის აღსანიშნავია "ზაფხულის ღამის სიზმარი" (თრეი მაკინტაერის ქორეოგრაფია), კ. მიოლერის "ციმბირიდან მოსკოვამდე" (ავგუსტ ბურნონვილის ქორეოგრაფია. თბილისში დაიდგა დანიის სამეფო ბალეტის ქორეოგრაფების მიერ), ა. მესაჟეს "ორი მტრედი" (ფ. ეშტონის ქორეოგრაფია). 2007 წელს ალექსანდრე ვასილიევთან ერთად მან შექმნა ა. კრეინის ბალეტ "ლაურენსიას" სცენოგრაფია ვახტანგ ჭაბუკიანის ამავე სახელწოდების ცნობილი ბალეტისთვის. მონავარდისაშვილი მონაწილეობდა ჯორჯ ბალანჩინის, ფრედერიკ ეშტონისა და ავგუსტ ბურნონვილის ბალეტების სცენოგრაფიის განხორციელებაში. 2009 წელს მონავარდისაშვილი მიწვეულ იქნა ნოვოსიბირსკის ოპერისა და ბალეტის სახელმწიფო თეატრში, სადაც გააფორმა ლ. მინკუსის ბალეტი "ბაიადერა".

ზურაბ ლომიძე წლების განმავლობაში ხელმძღვანელობდა თბილისის ოპერისა და ბალეტის თეატრს. მისი ხელმძღვანელობის პერიოდში მნიშვნელოვანი თეატრალური დადგმები განხორციელდა. თეატრს გასტროლები ჰქონდა მსოფლიოს მრავალ ქვეყანაში. განსაკუთრებით მნიშვნელოვანია 90-იანი წლების სამოქალაქო დაპირისპირებისა და არეულობის წლები. ლომიძის ხელმძღვანელობით თეატრში არ შეწყვეტილა შემოქმედებითი ცხოვრება, იმართებოდა პრემიერები. ეკონომიური და ენერგეტიკული პრობლემების მიუხედავად, შესაძლებელი გახდა დასის შენარჩუნება, თეატრის მატერიალური ბაზა გადაურჩა განადგურებას. ამჟამად ლომიძე, როგორც თეატრის ტექნიკური დირექტორი, ხელმძღვანელობს თეატრის შენობის სარეკონსტრუქციო სამუშაოს.