"ქრისტიან-დემოკრატები" თელავში სასაწყობე ინფრასტრუქტურის მშენებლობას ითხოვენ. ამის შესახებ დღეს სოფელ კურდღელაურის მოსახლეობასთან შეხვედრის შემდეგ პარტიის ერთ-ერთმა ლიდერმა ნიკა ლალიაშვილმა განაცხადა.
პარლამენტის წევრის თქმით, მხოლოდ ერთი საციგურაო მოედნის ხარჯით შესაძლებელი იქნებოდა მთელი თელავისთვის უმნიშვნელოვანესი პრობლემის მოგვარება.
"ადგილობრივი მოსახლეობა სეზონზე იძულებულია ხილი მიზერულ ფასად გაყიდოს. სასაწყობე ინფრასტრუქტურის, სამაცივრე დანადგარების არსებობის პირობებში შესაძლებელი გახდებოდა პროდუქციის შენახვა და გაცილებით მომგებიან ფასად გასაღება. ამით ადგილობრივი გლეხიც იხეირებდა და ზამთარში დახლებზე ქართული ხილი და ბოსტნეულიც გამოჩნდებოდა. როგორც ჩანს, ხელისუფლებისთვის პრიორიტეტი სულ სხვა საკითხებია, რაც საბიუჯეტო თანხების არამიზნობრივ ხარჯვასა და ერთი და იგივე პროექტში მილიონობით ლარის გადახდას გულისხმობს", - განაცხადა ლალიაშვილმა.
ახალი ინიციატივის პარალელურად, "ქრისტიან-დემოკრატებმა" კურდღელაურის მოსახლეობას თელავის მაჟორიტარობის კანდიდატი ნიკო ლაშხი წარუდგინეს. სოფლისთვის პრიორიტეტულ პრობლემებზე ზრუნვას ლალიაშვილი მოსახლეობას საპარლამენტო დონეზე დაჰპირდა.
თელავის რაიონში შუალედური მაჟორიტარული არჩევნები 2 ოქტომბერს გაიმართება.