აჭარაში ტექნოლოგიური პარკის შექმნა იგეგმება. აჭარის მთავრობის ინფორმაციით, ვიცე-მარშალ მარიუს პლეშჩევსკის ხელმძღვანეობით ბათუმს ერთდღიანი ვიზიტით პოლონეთის - სილეზიის სავოევოდოს დელეგაცია ეწვია. სილეზიის სავოევოდოსა და აჭარის ავტონომიურ რესპულიკას შორის გაფორმებული თანამშრომლობისა და მეგობრობის შეთანხმების ფარგლებში, კომისიის პირველი სხდომა გაიმართა. შეხვედრაზე 2011-2012 წლების თანამშრომლობის გეგმა განიხილეს.
ორმხრივ შეხვედრაზე რეგიონებს შორის ტურიზმის განვითარების პერსპექტიულ მიმართულებებზე და ამ კუთხით სხვადასხვა ღონისძიებების განხორციელებაზე იმსჯელეს. გარდა ამისა, იგეგმება აჭარაში ტექნოლოგიური პარკის შექმნა და პოლონეთში ქართველ კარდიოლოგთა სტაჟირება.
სილეზიის სავოევოდასა და აჭარას შორის თანამშრომლობის შეთანხმება 2011 წლის 17 ივნისს პოლონეთში გაფორმდა. თანამშრომლობა ითვალისწინებს მჭიდრო პარტნიორობას ორ რეგიონს შორის ტურიზმის, ეკონომიკის, საინევსტიციო გარემოს, განათლების, კულტურის, ჯანდაცვისა და სოფლის მეურნეობის საკითხებში.
პოლონური მხარის მოწვევით, ოქტომბერში აჭარის მთავრობის დელეგაცია მონაწილეობას მიიღებს ევროპის მცირე და საშუალო ბიზნესკონგრესში, რომელიც კატოვიცეში გაიმართება.