21 აგვისტოს სტიქიამ კახეთის რეგიონს 6,8 მილიონი ლარის ზარალი მიაყენა. ყველაზე მეტად ლაგოდეხის რაიონი დაზარალდა, სადაც ზარალის ოდენობა 5 მილიონი ლარია. საგარეჯოს რაიონს 1 300 000 ლარის ზარალი მიადგა, გურჯაანს 500 000 ლარის.
ლაგოდეხის რაიონში სტიქია 21 აგვისტოს დილიდან გვიან ღამემდე მძვინვარებდა. ზაქათალის ქუჩაზე მდებარე საცხოვრებელი კორპუსებიდან 70 ოჯახის ევაკუაცია მოხდა. ძლიერი წვიმის შედეგად ადიდებულმა მდინარე „შრომის ხევმა" კორპუსების ეზოდან 8 ავტოფარეხი წაიღო, წყალმა მთლიანად დაანგრია რესტორანი „სანაპირო", დაგლიჯა მრავალწლიანი ხეები, დააზიანა ბუნებრივი აირის მილები, დაწყვიტა ელექტროსადენები. საცხოვრებელი სახლები, გზები და ნაკვეთები დაიტბორა სოფლებშიც. დაიხოცა შინაური ფრინველი და პირუტყვი.
საგარეჯოს რაიონის სოფლებში შიბლიანში, ყანდაურაში, ბადიაურსა და ბოგდანოვკაში სასმელი წყლის სათავე ნაგებობები და ქსელი განადგურდა. მნიშვნელოვნად არის დაზიანებული შიდა საუბნო გზებიც.
სტიქიის შედეგად გურჯაანის რაიონში სასმელი წყლის სათავე ნაგებობები, ხიდები, ბოგირები, ღვარსადენები და შიდა საუბნო გზები დაზიანდა.
