მოსკოვი საერთაშორისო ტერორიზმში ოფიციალურ დონეზე მონაწილეობს, - ამის შესახებ საქართველოს საგარეო საქმეთა მინისტრის მოადგილემ ნინო კალანდაძემ საქართველოში აშშ-ს საელჩოსთან მომხდარ ტერაქტზე აშშ-ს ცენტრალური სადაზვერვო სამმართველოს დასკვნის შეფასებისას აღნიშნა.
"აღნიშნულ ტერაქტთან დაკავშირებით ქართველმა სამართალდამცველებმა სრულფასოვანი და ამომწურავი გამოძიება ჩაატარეს და უტყუარი მტკიცებულებები არსებობდა და არსებობს იმის თაობაზე, რომ რუსეთის სპეცსამსახურები მონაწილებდა ტერაქტში", - აღნიშნა კალანდაძემ.
მისივე თქმით, აშშ-ს საელჩოსთან მომხდარი ტერაქტის შესახებ დეტალური ინფორმაცია ქართულმა მხარემ დაუყოვნებლივ მიაწოდა, როგორც პარტნიორ სახელმწიფოებს, ასევ რუსეთის ფედერაციას და თანამშრომლობისკენ მოუწოდა.
"თქვენ თანამშრომლობა შევთავაზეთ, რაზეც პასუხი არ მიგვიღია. ძალიან სამწუხარო და საგანგაშოა, რომ ოფიციალური მოსკოვი საერთაშრისო ტერორიზმში ოფიციალურ დონეზე მონაწილეობს", - აღნიშნა ნინო კალანდაძემ.
შეგახსენებთ, რომ გამოცემა "The Washington Times" ინფორმაციით, აშშ-ს ცენტრალური სადაზვერვო სამმართველოს დასკვნით, გასული წლის სექტემბერში საქართველოში აშშ-ის საელჩოსთან აფეთქებაზე პასუხისმგებლობა გრუ-ს ეკისრება.
