აზერბაიჯანსა და სომხეთს შორის ომის განახლება საქართველოსთვის დიდი რისკის შემცვლი იქნება.
ამის შესახებ ევროპასთან ინტეგრაციის საპარლამენტო კომიტეტის თავმჯდომარე დავით დარჩიაშვილმა აზერბაიჯანის ვიცე პრემიერ-მინისტრ ალი გასანოვის მიერ გაკეთებულ განცხადებაზე კომენტირებისას აღნიშნა.
"ომი თუ მოხდა, ის რუსეთს საშუალებას მისცემს მასში ჩაერთოს და ამისთვის რაღაც მიზეზი ან საბაბი გამოიყენოს. თუ ჩაერევა, შეიძლება ცდუნება გაუჩნდეს, რომ ომში ჩასართავად საქართველოს ტერიტორია გამოიყენოს. ეს კი რისკის შემცველი", - აღნიშნა დეპუტატმა.
მისივე თქმით, აზერბაიჯანსა და სომხეთს შორის ომის დაწყების შემთხვევაში არ არის გამორიცხული, რომ საბრძოლო მოქმედებებში ჩასართავად რუსეთის ჯარების მოძრაობა საქართველოს ტერიტორიიდან მოხდეს, რაც დიდი რისკის შემცველია.
"რა თქმა უნდა, რუსეთი თავისი ჯარების მოძრაობას ჩვენს დაუკითხავად განახორცილებს, რადგან მთიანი ყარაბაღის კონფლიქტთან დაკავშირებით ჩვენ ნეიტრალური მხარე გვიკავია. რაც შეეხება რუს სამხედროებთან ჩვენს ურთიერთობებს, ყველამ კარგად იცის რაც ხდება და ამიტომ არ არის გამორიცხული, რომ ავღმოჩნდეთ პროვოკაციების და აგრესიის საფრთხის წინაშე", - დასძინა დარჩიაშვილმა.
შეგახსენებთ, რომ აზერბაიჯანის ვიცე პრემიერ-მინისტრმა ალი გასანოვმა ერთ-ერთ თურქულ გამოცემას ინტერვიუ მისცა, სადაც აღნიშნა, რომ მთიანი ყარაბაღის კონფლიქტის დარეგულირების პროცესის არსებულ კალაპოტში გაგრძელების შემთხვევაში აზერბაიჯანი ომს გამოაცხადებს.
