თურქული კომპანია Kutas-ი აჭარაში დაფნის გადამამუშავებელი საწარმოს გახსნას გეგმავს. ქართულ ბაზარზე შემოდის ასევე საფუარის მწარმოებელი კომპანია Pakmaya, რომელიც აჭარაში საკუთარ წარმომადგენლობას გახსნის. აჭარის სოფლის მეურნეობის სამინისტროს ინფორმაციით, ებრაული კომპანია Netafim-ის მიწვევით, აჭარის სოფლის მეურნეობის მინისტრი თურქეთში იმყოფებოდა. სამინისტროს ინფორმაციით, ვიზიტის მიზანი გახლდათ სამომავლო თანამშრომლობის დამყარების პერსპექტივების განხილვა თურქულ კომპანიებთან, აგრეთვე ადანაში ციტრუსისა და ხეხილის სანერგე მეურნეობის დათვალიერება, ახალი სახეობებისა და ჯიშების შესწავლა.
დელეგაციის წევრებმა, ვიზიტის ფარგლებში მოინახულეს კომპანია Kutas-ის რამდენიმე ქარხანა, მათ შორის ქონდრის, სანელებლების, დაფნის და მწნილის გადამამუშავებელი საწარმოები, გაეცნენ აღნიშნული მიმართულებით თანამედროვე მანქანა-დანადგარებს და ლაბორატორიულ აღჭურვილობებს, სტერილიზაციის თანამედროვე მეთოდებს, დაათვალიერეს თამბაქოს გადამამუშავებელი და დამფასოებელი ხაზები; კომპანიის ხელმძღვანელობასთან შეხვედრისას განიხილეს სამომავალო თანამშრომლობის გეგმები. კომპანია Kutas-ი გეგმავს აჭარაში დაფნის გადამამუშავებელი საწარმოს გახსნას. აღნიშნულ შეხვედრაზე განხილული იქნა აჭარაში საწარმოს ადგილმდებარეობის შერჩევის რამდენიმე ვარიანტი.
შეხვდნენ ციტრუსის გადამამუშავებელი ხაზების მწარმოებელ კომპანია Egemas-ს ხელმძღვანელობას და გაეცნენ ციტრუსის გადამამუშავებელი და დამფასოებელი ხაზების სხვადასხვა ვარიანტს.
ვიზიტის ბოლოს ქ. ადანაში შეხვდრა ჰქონდათ ადანის სავაჭრო ბირჟის ხელმძღვანელობასთან. სადაც განიხილეს ადანის სავაჭრო ბირჟის წევრების ინტერესის სფეროები აჭარის სოფლის მეურნეობის სექტორში.
მოინახულეს ადგილობრივი მსხვილი ციტრუსის მწარმოებელი კომპანია Ozler A.S-ის ციტრუსის ბაღები, აგრეთვე ციტრუსის და ხეხილის დამფასოებელი ხაზები, ციტრუსის ახალი ჯიშების შესწავლის მიზნით შეხვედრა ჰქონდათ ჩუკუროვას უნივერსიტეტთან არსებულ სანერგე მეურნეობაში, სადაც მოინახულეს თანამედროვე სანერგე და სადედე პლანტაციები, ლაბორატორია და გაეცნენ ნერგების გამოყვანის თანამედროვე მეთოდებს. მეურნეობაში იწარმოება ციტრუსის საძირე, ასევე ციტრუსის სხვადასხვა ჯიშები, ზეთისხილი და სხვა კურკოვანი კულტურები.
გამოცდის მიზნით, აღნიშნული სანერგიდან ჩამოტანილი იქნა 15 სახეობის სხვადასხვა ნერგი.