თბილისის მერიის განცხადებით, სამარშრუტო ტაქსებით მგზავრობის ღირებულება რეგულირებად სფეროს არ წარმოადგენს და ქალაქის მთავრობას მისი განსაზღვრა არ შეუძლია.
"ფასებს არეგულირებს ბაზარი და შესაბამისად თბილისის მერიასა და საკრებულოს არ შეუძლია მისი განსაზღვრა. მიკრო ავტობუსებში არ არსებობს ერთიანი ტარიფი. მგზავრობის საფასური მერყეობს 30 თეთრიდან 1,20 თეთრამდე", - ნათქვამია თბილისის მერიის განცხადებაში და აღნიშნულია, რომ თბილისის მერია მუნიციპალური ტრანსპორტით ავტობუსითა და მეტროთი, რომელთა ფასის ზრდა არ იგეგმება, კონკურენციას უწევს მიკროავტობუსებს.
"თბილისის მერია ასევე ზრუნავს სოციალურად დაუცველ მოსახლეობაზე და ახალ მიკრო ავტობუსებში მათი გადასახადის ნახევარს ანაზღაურებს", - ნათქვამია განცხადებაში.