ამერიკის შეერთებული შტატების სრულუფლებიანი და საგანგებო ელჩის ჯონ ბასის განცხადებით, აშკარაა, რომ ფოტორეპორტიორების საქმის მიმდინარეობით ყველა კმაყოფილი არაა. მისი თქმით, ამერიკის სახელმწიფო დეპარტამენტი საქმეზე დაკვირვებას გააგრძელებს.
"მოხარული ვარ რომ ომბუდსმენს დაკავებული ფოტორეპორტიორების მონახულების საშუალება მიეცა, მათი ჯანმრთელობის მდგომარეობის შესწავლა. რეალურად ეს ობიექტური ინფორმაციის მიწოდებისთვის მნიშვნელოვანია. ეს ნიშნავს, რომ დაინტერესებული საზოგადოება აღარ იქნება ჭორებზე დამოკიდებული. საქმესთან დაკავშირებით ინფორმაცია ხელმისაწვდომი უნდა იყოს, მაგრამ არსებობს კანონის უზენაესობის პრინციპი, რომლის დაცვითაც ჩატარდება სასამართლო პროცესი. რამდენადაც ვიცი, სასამართლო პროცესის ჩატარების შემდეგ უფრო მეტი ინფორმაცია გახდება ცნობილი. ამ მიმართულებით მთავრობამ მნიშვნელოვანი ნაბიჯები გადადგა, რომელიც საზოგადოებისთვის მეტი ინფორმაციის მიწოდებისკენ არის მიმართული", - განაცხადა ბასმა ჟურნალისტებთან საუბრისას.
შეგახსნებეთ, რომ 7 ივლისს საქართველოს შინაგან საქმეთა სამინისტროს კონტრდაზვერვის დეპარტამენტის მიერ დაკავებულ იქნენ ზურაბ ქურციკიძე (ევროპის ფოტოსააგენტოს წარმომადგენელი საქართველოში), ირაკლი გედენიძე (პრეზიდენტის ადმინისტრაციის პრესსამსახურის ფოტოგრაფი), მისი მეუღლე ნათია გედენიძე და გიორგი აბდალაძე (საქართველოს საგარეო საქმეთა სამინისტროს ფოტოგრაფი).
ვადის ფარგლებში სამართალდამცავებმა ფოტორეპორტიორებს - ირაკლი გედენიძეს, ზურაბ ქურციკიძეს და გიორგი აბდალაძეს, ბრალი სისხლის სამართლის კოდექსის 314-ე - ჯაშუშობის მუხლით წაუყენეს.
გამოძიებამ 10 ათასი ლარის გირაოს სანაცვლოდ გაათავისუფლა პრეზიდენტის პირადი ფოტოგრაფის ირაკლი გედენიძის მეუღლე, ნათია გედენიძე. გამოძიებას აღიარებთი ჩვენება მისცა ირაკლი გედენიძემაც. გავრცელადა ინფორმაცია, რომ ბრალი აღიარა ზურაბ ქურციკიძემაც, თუმცა ოფიციალურად არ დადსტურებულა. აღიარებითი ჩვენება მისცა გიორგი აბდალაძემაც.
