არასამთავრობო ორგანიზაცია „ეკონომიკური პოლიტიკის ინსტიტუტი" დადებითად აფასებს დედაქალაქში ახალი სამარშუტო ტაქსების გამოჩენას. ინსტიტუტს მიაჩნია, რომ დედაქალაქში არსებული სატრასპორტო სისტემა მნიშვნელოვან განახლებას საჭიროებს და მისასალმებელია, რომ ამ მხრივ ინიციატივა კერძო სექტორმა აიღო ხელში. თუმცა, ამავე დროს ინსტიტუტი მნიშვნელოვნად მიიჩნევს, რომ მაქსიმალურად გათვალისწინებული იყოს იმ მძღოლების ინტერესები, რომლებიც აქამდე არსებულ სამარშუტო ტაქსებზე მუშაობდნენ და აქვთ სათანადო კვალიფიკაცია. აღნიშნულთან დაკავშირებით ინსტიტუტი ურჩევს კომპანია „თბილისის მიკროავტობუსს" გამოიჩინოს მეტი სოციალური პასუხისმგებლობა და მძღოლების დასაქმების პროცესი უფრო მეტად გამჭვირვალე გახადოს. ყოველივე ეს ხელს შეუწყობს ახალი კომპანიისადმი საზოგადოების მეტ კეთილგანწყობას.
ეკონომიკური პოლიტიკის ინსტიტუტს მიუღებლად მიაჩნია კერძო კომპანიისათვის ისეთი ტიპის შეზღუდვების დაწესება, რომელიც არღვევს თავისუფალი ბაზრის პრინციპებს (მაგალითად, წინასწარ განსაზღვრა მგზავრობის ფასის და ა.შ.). ინსტიტუტი თვლის, რომ მგზავრობის ფასი ახალ სამარშუტო მიკროავტობუსებზე უნდა დგინდებოდეს არა ბიუროკრატიული დადგენილებების არამედ რეალური დანახარჯები/სარგებლლიანობის ანალიზის საფუძველზე. მგზავრობის ფასების დადგენის საბაზრო მექანიზმი გამორიცხავს ყოველგვარ პოლიტიკურ სპეკულაციას აღნიშნული თემის ირგვლივ.