ბათუმის ტურისტული სააგენტო რეგიონის მოსახლეობასა და მის სტუმრებს ახალ ტურისტულ პროდუქტს - თემატურ ტურებს სთავაზობს. აჭარის ტურიზმის დეპარტამენტის ინფორმაციით, ბათუმის ტურისტულ საინფორმაციო ცენტრებში გაიყიდება ინდივიდუალური და ჯგუფური ტურისტული მარშრუტების პაკეტები, რომლებიც აჭარაში ტურიზმის განვითარებასა და სტუმრებისა თუ ადგილობრივებისათვის რეგიონის ბუნებრივი და კულტურული სიმდიდრეების უკეთ გაცნობას შეუწყობს ხელს.
ტურიზმის დეპარტამენტის ინფორმაციით, ამ დროისათვის არსებობს შემდეგი მარშრუტები: ბოტანიკური ბაღი და ნობელის მუზეუმი, გონიო-აფსაროსის ნაკრძალი და არქეოლოგიური მუზეუმი, მტირალას ეროვნული პარკი, მაღალმთიანი აჭარა, იახტით გასეირნება. ტურისტული მარშრუტები ხელმისაწვდომ ფასებში გაიყიდება, უკვე არსებულ ტურებს უახლოეს მომავალში დაემატება სხვა ახალი ტურისტული მარშრუტები.