სეპარატისტული სამხრეთ ოსეთის დელეგაცია, რომელიც ჯენევის საერთაშორისო მოლაპარაკებებში მონაწილეობს, მოლაპარაკებების მეორე სამუშაო ჯგუფში, სადაც დევნილთა საკითხების განხილვა მიმდინარეობს თავის მონაწილეობას აჩერებს. ეს გადაწყვეტილება ოსმა სეპარატისტებმა გაეროს გენერალური ასამბლეის მიერ მიღებული გადაწყვეტილების გამო მიიღეს, რომელშიც რუსეთის მიერ ოკუპირებულ საქართველოს ოროვე რეგიონში დევნილებისა და იძულებით გადაადგილებული პირების დაბრუნების უფლებაა დაფიქსირებული. ამ თემასთან დაკავშირებით ოსი სეპარატისტების განცხადებას რუსული მედია აქვეყნებს.
"განცხადებაში აღნიშნულია, რომ ამ თემის განხილვა დაინტერესებული მხარეების, აფხაზეთისა და სამხრეთ ოსეთის გარეშე მიმდინარეობდა და ეს გახდა მიზეზი იმისა, რომ რეზოლუცია პრობლემას დამახინჯებული ფორმით ასახავს", _ ნათქვამია განცხადებაში, რომელშიც სეპარატისტები ამ და ასამბლეის მიერ მიღევულ რეზოლუციებს "ქართულ რეზოლუციებს" უწოდებენ.
"ზემოთქმულის გათვალისწინებით, სამხრეთ ოსეთიდან ჟენევის საერთაშორისო მოლაპარაკების წევრები უფლებამოსილნი არიან განაცხადონ, რომ აჩერებენ თავიანთ მონაწილეობას დევნილებთან დაკავშირებით მომუშავე მეორე სამუშაო ჯგუფის მუშაობაში", _ აცხადებენ სეპარატისტები და აღნიშნავენ, რომ მომავალში ისინი "ყველა დაინტერესებული მხარის მონაწილეობით აპირებენ ამ თემატიკის განხილვას".
