მთავრობას რეფერენდუმის ჩატარების გარეშე საერთო-სახელმწიფოებრივი გადასახადების 3 წლის ვადით გაზრდის უფლება დარჩა. აღნიშნულთან დაკავშირებით "ეკონომიკური თავისუფლების შესახებ" კანონი პარლამენტმა რიგგარეშე სხდომაზე მესამე მოსამენით მიიღო.
მიღებული გადაწყვეტილების თანახმად, საერთო-სახელმწიფოებრივი გადასახადების ახალი სახის შემოღება (გარდა აქციზისა) შესაძლებელია მხოლოდ რეფერენდუმის გზით. რეფერენდუმის დანიშვნის ინიციატივის უფლება მხოლოდ საქართველოს მთავრობას აქვს.
საერთო-სახელმწიფოებრივი გადასახადების ახალი სახის შემოღებად ან ზღვრული განაკვეთის გაზრდად არ ჩაითვლება გადასახადის შემოღება ან ცვლილება, რომელიც არსებული გადასახადის ალტერნატივაა ან ანაცვლებს მას და ამავე დროს არ ზრდის საგადასახადო ტვირთს. საერთო-სახელმწიფოებრივი გადასახადის ახალი სახის შემოღებად ან ზღვრული განაკვეთის გაზრდად არ ჩაითვლება აგრეთვე გადასახადის არსებული ზღვრული განაკვეთის ფარგლებში გადასახადის განაკვეთის ცვლილება.
კანონის ამოქმედების შემდეგ საგადასახადო კოდექსში გაიწერება საერთო-სახელმწიფოებრივი გადასახადების სახეები. ესენია - საშემოსავლო გადასახადი; მოგების გადასახადი; დამატებითი ღირებულების გადასახადი (დღგ); იმპორტის გადასახადი და აქციზი.
ამასთან, მთავრობას უფლებამოსილება რჩება საერთო-სახელმწიფო გადასახადების დროებით გაზრდასთან დაკავშირებით. კერძოდ, საქართველოს მთავრობას უფლება აქვს მოითხოვოს გადასახადების დროებით გაზრდა არა უმეტეს 3 წლის ვადით. გადასახადების დროებით გაზრდის შემთხვევაში, რეფერენდუმი არ ტარდება.
კანონი ძალაში შევა 2013 წლის 31 დეკემბრიდან.
