რელიგიური გაერთიანებების საჯარო სამართლის იურიდიულ პირებად აღიარება ქართული შემწყნარებლობის ტრადიციაა. ამის შესახებ პარლამენტის რიგგარეშე სხდომაზე საპარლამენტო უმრავლესობის წევრმა ნუგზარ წიკლაურმა განაცხადა.
მისი შეფასებით, საქართველო ხდება ქვეყანა, რომელიც ეფუძნება ახალი დემოკრატიული სახელმწიფოს პრინციპებს. დეპუტატმა ილია ჭავაჭავაძის მაგალითი მოიყვანა, რომ თავის დროზე ილია ჭავჭავაძე სათავეში ჩაუდგა ყურანის ქართულ ენაზე თარგმნის საქმეს, რათა იგი ქართველი მუსლიმანებისთვის ხელმისაწვდომი ყოფილიყო.
"საქართველოში მართლმადიდებლური ეკლესიის როლი განსაკუთრებულია და ეს ასახულია კონკორდატშიც, სხვა რელიგიებთან მიმართებაში ახალი ინიციატივის განხორციელება კი იქნება ნიშანი იმისა, რომ საქართველო მათზედაც ზრუნავს. სხვა რელიგიების ჩაგვრას არასოდეს დავუბრუნდებით", - აღნიშნა წიკლაურმა.
შეგახსენებთ, რომ "სამოქალაქო კოდექსში" ცვლილებების კანონპროექტის თანახმად, საქართველოსთან მჭიდრო ურთიერთობაში მყოფი რელიგიური გაერთიანებები, კერძოდ, რომაული კათოლიკური ეკლესია, სომხური სამოციქულო წმინდა ეკლესია, ბაფთისტური ეკლესია, მუსლიმანთა თემი და იუდეველთა თემი, საჯარო სამართლის იურიდიული პირები უნდა იყვნენ.
