ნეიტრალური სამგზავრო დოკუმენტის ღირებულება 35 ლარია, პირადობის ნეიტრალური მოწმობის - 10 ლარი. აღნიშნულთან დაკავშირებით პარლამენტმა "სამოქალაქო რეესტრის სააგენტოს მიერ გაწეული მომსახურებისთვის დაწესებული საფასურის შესახებ" კანონში ცვლილებები მესამე მოსმენით დაამტკიცა.
მიღებული გადაწყვეტილების თანახმად, ნეიტრალური სამგზავრო დოკუმენტის განაცხადის შეტანიდან 10 სამუშაო დღის ვადაში გაცემისთვის მომსახურების საფასურის განაკვეთი 35 ლარია, ხოლო პირადობის ნეიტრალური მოწმობის განცხადების შეტანიდან 10 სამუშაო დღის ვადაში გადაცემისთვის მომსახურების საფასურის განაკვეთი - 10 ლარი.
შეგახსენებთ, რომ ნეიტრალური სამგზავრო დოკუმენტი და პირადობის ნეიტრალური მოწმობები გათვალისწინებულია აფხაზეთის ავტონომიური რესპუბლიკისა და ცხინვალის რეგიონის ტერიტორიაზე საქართველოს იურისდიქციის სრულად აღდგენამდე ლეგიტიმურად მცხოვრები პირებისთვის.