"კაუკაზუს ენერჯი ენდ ინფრასთრაქჩამ" მტკვრის 46 მეგავატიანი ჰიდროელექტროსადგურის მშენებლობის პროექტის ფარგლებში შემოვლითი არხის მშენებლობა დაიწყო. "ბი ჯი კაპიტალის" კომპანიისგან მიღებულ მთავარ სიახლეს წარმოადგენს ჰიდროელექტროსადგურის სამშენებლო სამუშაოს დასაფინანსებლად OPIC-ის (უცხოური კერძო საინვესტიციო კორპორაცია) მიერ 58 მლნ აშშ დოლარის ოდენობის სესხის გამოყოფა. ვინაიდან პროექტი ჯერ არ დასრულებულა, კომპანიის ფინანსური მაჩვენებლები უმნიშვნელოა: 2011 წლის პირველ კვარტალში, შემოსავლებმა დაახლოებით 1,800 აშშ დოლარი შეადგინა, მაშინ როდესაც EBITDA უარყოფითი იყო და 282,000 აშშ დოლარს, ხოლო წმინდა მოგება -66,000 აშშ დოლარს გაუტოლდა.
"უცხოური კერძო საინვესტიციო კორპორაციის მიერ გამოყოფილი 58 მლნ აშშ დოლარის ოდენობის სესხი მტკვრის პროექტისთვის ძალზე მნიშვნელოვანია და საკმარისია პროექტის დასაფინანსებლად, რომლის მთლიანი ღირებულება 90 მლნ აშშ დოლარს უტოლდება. მიუხედავად იმისა, რომ პროექტის სრულად დაფინანსებისთვის საჭირო თანხები უკვე მობილიზებულია, დასრულების დრო ჯერ კიდევ კითხვის ნიშნის ქვეშ დგას. ამჟამად ძნელია დადგინდეს, მოახერხებს თუ არა კომპანია პროექტის დასრულებას 2013 წლისთვის. დიდი ინტერესით ველით სიახლეებს 9.6-კილომეტრიანი შემოვლითი გვირაბის გაყვანის თაობაზე, რომლის მშენებლობა ყველაზე მეტ დროს მოითხოვს", - განაცხადა "ბი ჯი კაპიტალის" სააქციო კაპიტალის ბაზრის ანალიტიკოსმა გიორგი ირემაშვილმა.
