პოლიტიკაში ქალების აქტიური მონაწილეობის მხრივ საქართველოს დაბალი მაჩვენებელი აქვს. ამის შესახებ ევროპის განვითარებისა და რეკონსტრუქციის ბანკის კვლევაშია ნათქვამი.
"განსხვავებები გენდერული ნიშნით" - კვლევის ამ ნაწილში აღნიშნულია, რომ კომუნიზმის დაშლამ დიდად იმოქმედა ქალების შრომით ბაზარზე გასვლის შესაძლებლობაზე.
"მიუხედავად იმისა, რომ წარსულში ქალებს არ გააჩნდათ პოლიტიკური ან პრაქტიკული არჩევანი და უნდა ემუშავათ სამსახურში არსებული მნიშვნელოვანი დისკრიმინაციის პირობებშიც კი, ქალების უმრავლესობა მაინც დასაქმებული უნდა ყოფილიყო. დღესდღეობით, გარდამავალი ეკონომიკის მქონე ქვეყნებში ქალები ნაკლებად შოულობენ მათალხელფასიან სამსახურს მამაკაცებთან შედარებით. ამ ფაქტის ბევრი განმარტება არსებობს, მაგრამ მათ შორის მაინც მოიაზრება ნახევარ განაკვეთზე სამსახურის არარსებობა, დამსაქმებლების მიერ დედების დისკრიმინაცია და საბავშვო ბაღების არარსებობა", - აღნიშნულია კვლევაში.
კვლევის ავტორები მიიჩნევენ, რომ ამ კუთხით სურათი განსხვავებულია.
"ქალები უფრო მეტად სავარაუდოა დასაქმებულნი იყვნენ ცენტრალური ევროპის ქვეყნებში და ნაკლებად სავარაუდოა სამხრეთ ევროპის ქვეყნებში. დამოუკიდებელ სახელმწიფოთა თანამეგობრობაში (დსთ) განსხვავება უფრო თვალსაჩინოა. რუსი ქალების 70 პროცენტი კვლევის წინამორბედ წელს მუშაობდენ, ხოლო სომხეთში, აზერბაიჯანსა და ტაჯიკეთში -გამოკითხულთა მხოლოდ ერთი მეოთხედი. მათი გენდერული უთანასწორობის მიუხედავად, ქალები ზოგადად უფრო კმაყოფილნი არიან ცხოვრებით, ვიდრე მამაკაცები. ისინი დემოკრატიასაც და საბაზრო ეკონომიკასაც მეტად უჭერენ მხარს", - აღნიშნულია დოკუმენტში.
კვლევაში ნათქვამია, რომ ქალებს, მამაკაცების მსგავსად, წარმატებით შეუძლიათ სესხის აღება და საკუთარი ბიზნესის წამოწყება.
"თუმცა პოლიტიკაში აქტიური მონაწილეობა ქალებში უფრო დაბალია. მაგალითისათვის, თუ ავიღებთ პარლამენტში ქალი დეპუტატების რაოდენობას, ყველაზე მაღალი მაჩვენებელი ხორვატიაში, ჩეხეთის რესპუბლიკაში, ესტონეთსა და უზბეკეთშია (22-24%). ყველაზე დაბალია ამ მხრივ მაჩვენებელი (4-8%) საქართველოში, მონღოლეთსა და უკრაინაში", - აღნიშნულია კვლევაში.
შეგახსენებთ, რომ ევროპის განვითარებისა და რეკონსტრუქციის ბანკი "ცხოვრება გარდამავალ პერიოდში" კვლევის შედეგებს ავრცელებს. კვლევა - "ცხოვრება გარდამავალ პერიოდში" - ევროპის რეკონსტრუქციისა და განვითარების ბანკმა და მსოფლიო ბანკმა 2010 წლის ბოლოს ერთობლივად ჩაატარეს. გამოკითხული იქნა დაახლოებით 39 000 რესპოდენტი 34 ქვეყანაში - ბრიტანეთიდან ბალკანეთამდე, ალბანეთიდან უზბეკისტანამდე, უკიდურესი დასავლეთით საფრანგეთიდან უკიდურეს აღმოსავლეთით მონღოლეთამდე. კვლევაში წარმოდგენილია ნათელი დადასტურება იმისა თუ როგორ იმოქმედა გლობალურმა ეკონომიკურმა კრიზისმა და მისმა შედეგებმა ადამიანების ცხოვრებაზე. კვლევის მიზანია, ნათელი გახდეს, რა გავლენა იქონია ბოლოდროინდელმა კრიზისმა და ბერლინის კედლის მოშლიდან ორი ათწლეულის განმავლობაში სოციალურმა, პოლიტიკურმა და ეკონომიკურმა გარდაქმნამ მოქალაქეებზე - განსაკუთრებით ყოფილ კომუნისტურ ქვეყნებში. იგივე კითხვა დაუსვეს მოქალაქეებს დასავლეთ ევროპის ხუთ ქვეყანაში - ბრიტანეთში, საფრანგეთში, გერმანიაში, იტალიასა და შვედეთში.
