"ქართული პარტიის" პოლიტიკური მდივნის ეროსი კიწმარიშვილის თქმით, საქართველოს მთავარი პროკურატურის გადაწყვეტილება ირაკლი ოქრუაშვილისთვის ბრალის წაყენებისა და სისხლის სამართლებრივი დევნის დაწყების თაობაზე მისთვის მოულოდნელი არ ყოფილა.
ეროსი კიწმარიშვილის განცხადებით, ამ ნაბიჯს წინ უძღვოდა ფსევდო-ოპოზიციური, ხელისუფლების სატელიტი პარტიების მოწოდება ირაკლი ოქრუაშვილის ექსტრადიციის მოთხოვნის შესახებ.
"ეს ყველაფერი ძალიან ჰგავს გასული საუკუნის 30-იან წლების „აღშფოთებული" საბჭოთა მოქალაქეების მოთხოვნებს, რომ სამაგალითოდ დაესაჯათ და გაესამართლებინათ ტროცკისტები და სხვა „ანტისაბჭოთა ელემენტები", - აცხადებს კიწმარიშვილი.
ამასთან, ის აღნიშნავს, რომ ვანო მერაბიშვილის უწყების მიერ ტირაჟირებულ სიცრუეს უკვე ბავშვიც კი აღარ იჯერებს და ამიტომ, ამ თემაზე სერიოზული კომენტარის გაკეთება ზედმეტად მიაჩნია.
„ყველა ხედავს, რითი ერთობა გადასახადების გადამხდელებისგან აკრეფილი ფულით შინაგან საქმეთა სამინისტრო და პროკურატურა. ეს არის ტერორი, ფაქტების ფალსიფიცირება, საზოგადოების დეზინფორმირება და ა.შ", - აცხადებს „ქართული პარტიის" ერთ-ერთი ლიდერი.
პოლიტიკური მდივანი მიიჩნევს, რომ სააკაშვილის რეჟიმის მიერ უნიჭოდ დადგმულ პოლიტიკურ სპექტაკლები სასაცილოდ არ ეყოფოდა, რომ არა ათეულობით უდანაშაულო ადამიანის დაპატიმრება, მათი წამება და ციხეებში ჩაყრა.
„რომ არა ეს მომენტი, ეს თემა „ქართული პარტიისთვის" სრულიად უინტერესო იქნებოდა", - აღნიშნავს ეროსი კიწმარიშვილი.
მისი თქმით, არავის ეჭვი არ ეპარება იმაში, რომ ირაკლი ოქრუაშვილს წინა ბრალდებებიც პოლიტიკური მოტივაციით წაუყენეს და ის საზღვარგარეთ იძულების წესით გაუშვეს იმის შიშით, რომ სააკაშვილის რეჟიმისთვის სერიოზულ საფრთხეს წარმოადგენდა.
„დღესაც ყველა ეს მცდელობა მიმართულია „ქართული პარტიისა" და ირაკლი ოქრუაშვილის წინააღმდეგ და მას საფუძვლად უდევს ის შიში, რომელიც სააკაშვილს აწუხებს. ამიტომ, ის ათასგვარი გზებით ცდილობს ჩვენს დისკრედიტაციას და პრობლემების შექმნას. ამაში ახალს ვერაფერს ვხედავ", - განმარტავს პარტიის პოლიტიკური მდივანი.
