სასამართლოს ფსიქიატრიული დაწესებულების ადმინისტრაციის მიმართვის განსახილველად დაწესებული დროითი შეზღუდვა ეხსნება.
აღნიშნულთან დაკავშირებით ცვლილება შედის "ფსიქიატრიული დახმარების შესახებ" კანონში.
დღეს მოქმედი ნორმის თანახმად, თუ ექიმ-ფსიქიატრთა კომისია საჭიროდ მიიჩნევს არანებაყოფლობითი სტაციონარული ფსიქიატრიული დახმარების 6 თვეზე მეტი ვადით გაგრძელებას, ფსიქიატრიული დაწესებულების ადმინისტრაცია პაციენტის არანებაყოფლობითი სტაციონარული ფსიქიატრიული დახმარების 6-თვიანი ვადის ამოწურვამდე 72 საათით ადრე მიმართავს სასამართლოს ამ ვადის გაგრძელების შესახებ.
სასამართლო გადაწყვეტილებას იღებს ფსიქიატრიული დაწესებულების ადმინისტრაციის მიმართვიდან 72 საათში, საქართველოს ადმინისტრაციული საპროცესო კოდექსით დადგენილი წესით.
ამასთან, ფსიქიატრიული დაწესებულების ადმინისტრაცია უფლებამოსილია ექიმ-ფსიქიატრთა კომისიის დასკვნის საფუძველზე არანებაყოფლობითი სტაციონარული ფსიქიატრიული დახმარების ვადის გაგრძელების თხოვნით მიმართოს სასამართლოს შეუზღუდავად, ვიდრე არ ამოიწურება არანებაყოფლობითი სტაციონარული ფსიქიატრიული დახმარების კრიტერიუმები.
კანონპროექტის თანახმად, კი თუ ექიმ-ფსიქიატრთა კომისია საჭიროდ მიიჩნევს არანებაყოფლობითი სტაციონარული ფსიქიატრიული დახმარების 6 თვეზე მეტი ვადით გაგრძელებას, ფსიქიატრიული დაწესებულების ადმინისტრაცია პაციენტის არანებაყოფლობითი სტაციონარული ფსიქიატრიული დახმარების 6-თვიანი ვადის ამოწურვამდე 72 საათით ადრე მიმართავს სასამართლოს ამ ვადის გაგრძელების შესახებ.
შესაბამისად საკანონმდებლო ინიციატივიდან ამოღებულია სასამართლოს ვალდებულების ნაწილი, ასევე აღარ არის დაკონკრეტებული ადმინისტრაციას ფსიქიატრიული დახმარების ვადის გაგრძელების თხოვნით რამდენჯერ შეუძლია მიმართოს.
კანონპროექტის ავტორები არიან დეპუტატები პავლე კუბლაშვილი, კახაბერ ანჯაფარიძე, ჩიორა თაქთაქიშვილი და ანდრო ალავიძე.
