ახმეტის რაიონის სოფელ ალავერდში მდინარე შავკაბას ხევის გაწმენდითი სამუშაოები დაიწყო. ამის შესახებ კახეთის საინფორმაციო ცენტრს ახმეტის მუნიციპალიტეტის გამგებელმა კობა მაისურაძემ განუცხადა.
მისი თქმით, გაწმენდითი სამუშაოები მონასტრის კუთვნილი საფუტკრე მეურნეობის ტერიტორიაზე მიმდინარეობს, რომელიც სტიქიის შედეგად განადგურდა.
„ამჟამად დატბორილ ადგილებს ვხსნით, რომ წყლის დონე დავწიოთ. ჩვენ დიდ პროექტზე ვმუშაობთ. მდინარე შავკაბას ხევი მთლიანად უნდა მოვაცილოთ ალავერდის ტაძარს, კალაპოტი უნდა შევუცვალოთ. ალავერდიდან კილომეტრის მანძილზე ხევზე გაკეთდება დამცავი ჯებირები და შავკაბას ხევს მდინარე ალაზანში ჩავუშვებთ", - განაცხადა გამგებელმა.
ალავერდის ტაძარში მე-13 საუკუნის ფრესკებს განადგურება ემუქრება. ტაძარში რამდენიმე ადგილზე წყალი დგას. წყლით არის დაფარული ღირსი მამის, იოსებ ალავერდელის საფლავის მიმდებარე ტერიტორიაც. დანესტილი და დაობებულია კედლები. სპეციალისტების შეფასებით, წვიმების შემთხვევაში ტაძრის და სამონასტრო კომპლექსის დატბორვა ისევ მოსალოდნელია. მათივე თქმით, საფრთხე ტაძრის მდგრადობასაც ემუქრება
