24 ივნისს, 16:00 საათზე, გაეროს სახლის საკონფერენციო დარბაზში (რ. ერისთავის 9) გაიმართება გაეროს თვითნებური დაკავების საკითხებზე მომუშავე სამუშაო ჯგუფის პრეს კონფერენცია. წარმოდგენილი იქნება ვიზიტის დროს გაკეთებული წინასწარი დასკვნები.
სამუშაო ჯგუფის დელეგაციას მთავარი მომხსენებელი ელ ჰადჯი მალიკ სოუ ხელმძღვანელობს.
სამუშაო ჯგუფი ეწვია პენიტენციურ დაწესებულებებს, საპატიმროებს, ქალთა და არასრულწლოვანთა სასჯელაღსრულების დაწესებულებებს. ასევე გამართა შეხვედრები მთავრობის წარმომადგენლებთან, არასამთავრობო ორგანიზაციებთან, გაეროს სააგენტოების ხელმძღვანელებთან და სხვა პარტნიორებთან, რათა მოეხდინა თავისუფლების აღკვეთის კუთხით მოქმედი ინტიტუციონალური და სამართლებრივი ნორმების შეფასება. ჯგუფის მიერ შემუშავებული დასკვნითი ანგარიში წარდგენილი იქნება ადამიანის უფლებათა საბჭოზე 2012 წელს.
გაეროს ადამიანის უფლებათა დაცვის ყოფილმა კომისიამ ზემოხსენებული სამუშაო ჯგუფი 1991 წელს დააარსა (თავისუფლების თვითნებურ აღკვეთასთან დაკავშირებით წამოყენებული ბრალდებების შესწავლის მიზნით). 1997 წელს ჯგუფის მანდატი გაფართოვდა და დამატებით მოიცვა მიგრანტებისა და თავშესაფრის მაძიებელთა ადმინისტრაციულ დაკავებასთან დაკავშირებული საკითხები. 2010 წლის 30 სექტემბერს გაეროს ადამიანის უფლებათა საბჭომ სამუშაო ჯგუფს მანდატი კიდევ სამი წლით გაუგრძელა.
