რუსეთმა არათუ შეასრულა, გეგმაზე მეტადაც შესრულა თავისი ვალდებულებები, რომლებიც "მედვედევისა და სარკოზის" გეგმის მიხედვით ჰქონდა ნაკისრი. ეს განცხადება ოს სეპარატისტთა ლიდერის ე.წ. რწმუნებულმა პოსტკონფლიქტური დარეგულირების საკითხებში, ბორის ჩოჩიევმა, საქართველოს პარლამენტის თავმჯდომარის, დავით ბაქრაძის მიერ გაკეთებული განცხადების კომენტირებისას გააკეთა. განცხადებაში საქართველოს პარლამენტის თავმჯდომარე საუბრობდა იმაზე, რომ რუსეთს "მედვედევ-სარკოზის" გეგმით გათვალისწინებული ვალდებულებების შესრულება უნდა "აიძულონ".
"რუსმა სამშვიდობოებმა მხოლოდ მას შემდეგ უნდა დატოვონ დისლოკაციის ადგილი, რაც გაფორმებული იქნება იურიდიულად სავალდებულო დოკუმენტი საქართველოს მიერ აფხაზეთსა და სამხრეთ ოსეთთან მიმართებაში ძალის გამოუყენებლობის შესახებ", _ განაცხადა ჩოჩიევმა.
მისი თქმით, ე.წ. დამოუკიდებელი სამხრეთ ოსეთის რესპუბლიკა თავად გადაწყვეტს, როდის უნდა დატოვონ მისი ტერიტორია რუსმა სამხედროებმა.
"ვიდრე სამხრეთ ოსეთისთვის არსებობს საფრთხე, რომელიც მტრულად განწყობილი საქართველოდან მომდინარეობს, სამხედო ბაზები აქ დარჩება, ორმხრივი შეთანხმებების საფუძველზე", - განაცხადა ჩოჩიევმა და კომენტარი საქართველოს საგარეო საქმეთა მინისტრის მოადგილე ნინო კალანდაძის მიერ გაკეთებულ განცხადებაზედაც გააკეთა. შეგახსენებთ: კალანდაძემ განაცხადა, რომ საქართველო აფხაზეთისა და ე.წ. სამხრეთ ოსეთის ტერიტორიაზე საერთაშორისო დამკვირვებლების შეშვების საკითხზე ჟენევაში ისაუბრებს.
"ეს საკითხი არასოდეს განხილულა და არც იქნება განხილული ჟენევის დისკუსიების ფორმატში. ეს საკითხი მხოლოდ "სარკოზი-მედვედევის გეგმის მიხედვით შეიძლება გადაწყდეს", _ განაცხადა ჩოჩიევმა.
