უკრაინის პრეზიდენტის, ვოლოდიმირ ზელენსკის განცხადებით, რუსეთმა 14 ოქტომბრის ღამეს უკრაინის ენერგეტიკულ ინფრასტრუქტურაზე ბალისტიკური რაკეტებით მიზანმიმართული დარტყმა განახორციელა, რითაც აშშ-ის პრეზიდენტის, დონალდ ტრამპის მიმართ დემონსტრაციული უპატივცემულობა გამოავლინა.
ამის შესახებ ზელენსკი სოციალურ ქსელ X-ზე წერს.
ზელენსკის ცნობით, ღამის განმავლობაში რუსეთმა უკრაინის ენერგეტიკული და კრიტიკული ინფრასტრუქტურის წინააღმდეგ 39 ბალისტიკური რაკეტა და 120-ზე მეტი დამრტყმელი დრონი და საბრძოლო მასალა გამოიყენა. დარტყმები განხორციელდა კიევში, კიევის ოლქსა და ხარკივში.
„რუსეთმა ენერგეტიკულ ობიექტებზე მიზანმიმართული ბალისტიკური სარაკეტო დარტყმა განახორციელა - სწორედ იმ ობიექტებზე, რომლებთან დაკავშირებითაც ამერიკის პრეზიდენტმა ცეცხლის შეწყვეტის რეჟიმი გამოაცხადა. ეს სრულიად მიზანმიმართული დარტყმა იყო, რომლის მასშტაბიც საჩვენებლად იყო შერჩეული. რუსეთის მხრიდან ამერიკის მიმართ ასეთი დემონსტრაციული უპატივცემულობა აქამდე არ გამოუვლენია. რუსეთი ამერიკის პრეზიდენტის განცხადებებს ძლიერად არ მიიჩნევს“, - წერს ზელენსკი.
მისი თქმით, ამ დროისთვის ელექტროენერგიის გარეშე, სულ მცირე, 600 000 ადამიანია დარჩენილი, თუმცა გამორთვის მასშტაბი შესაძლოა კიდევ უფრო გაიზარდოს.
„ჩვენ მოვუწოდებთ ამერიკას და ყველას მსოფლიოში, ვინც რეალობას თვალს არ არიდებს, რეაგირებისკენ - და ეს რეაგირება მკაცრი უნდა იყოს. რუსეთმა დეესკალაციის შესაძლებლობა ხელიდან გაუშვა და მკაფიოდ გადაწყვიტა, გააგრძელოს თავისი გიჟური, განადგურებისკენ მიმართული ომი.
მოვუწოდებთ პრეზიდენტ ტრამპს, რუსეთის წინააღმდეგ მკაცრი სანქციები დააწესოს, მით უმეტეს, რომ ლინდსი გრემის კანონი, რომელიც ახლახან მიიღეს და რომელსაც ხელი მოეწერა, ამის შესაძლებლობას იძლევა და შესაბამის ზომებს განსაზღვრავს“, - აღნიშნავს უკრაინის პრეზიდენტი.
ზელენსკის განცხადებით, აშშ-ის პრეზიდენტს აქვს ყველა საჭირო და საკმარისი ინსტრუმენტი იმისთვის, რომ ძალის, სამართლიანობისა და აგრესორზე ზეწოლის გზით მშვიდობის დამყარებას ხელი შეუწყოს.
უკრაინის პრეზიდენტმა ასევე მოითხოვა, რომ უკრაინას Patriot-ის საჰაერო თავდაცვის სისტემებისთვის დამატებითი ანტისარაკეტო რაკეტები მიაწოდონ.
„სრულიად სამართლიანად ვეუბნებით შეერთებულ შტატებს, ევროპასა და ყველა ჩვენს პარტნიორს, რომ მსოფლიოს არცერთი ქვეყანა არ უნდა დარჩეს მარტო ისეთი შეშლილი და ომის მომხრე ძალის წინაშე, როგორიც რუსეთია“, - თქვა ზელენსკიმ.
