თელავის თეატრის მმართველმა დუტა სხირტლაძემ თეატრის მთავარი რეჟისორის გოგი ჩაკვეტაძის გათავისუფლების შესახებ ბრძანება დაწერა. „კახეთის საინფორმციო ცენტრს" გოგი ჩაკვეტაძემ განუცხადა, რომ თეატრის თანამშრომლებმა ბრძანება დახიეს და იგი ისევ აგრძელებს თეატრში მუშაობას.
„დაახლოებით ერთი კვირის წინ დაუწერია ბრძანება, მაგრამ მე არც დუტა მინახავს და არც ბრძანება. ჩემმა მხარდამჭერებმა დახიეს ბრძანება და ჯერ-ჯერობით ისევ ვაგრძელებ მუშაობას თეატრში. მეტი არაფერი ვიცი."- განაცხადა გოგი ჩაკვეტაძემ.
კახეთის საინფორმაციო ცენტრი დუტა სხირტლაძესთან დაკავშირებას მთელი დღე ცდილობს, თუმცა თელავის თეატრის მმართველმა სატელეფონო ზარებს არ პასუხობს.
დაპირისპირება თელავის თეატრის მმართველსა და თეატრის რამდენიმე თანამშრომელს შორის 3 თვის წინ დაიწყო. თეატრის თანამშრომლები დუტა სხირტლაძეს, ნეპოტიზმში, მოვალეობის შეუსრულებლობასა და უყურადღებობაში ადანაშაულებდნენ. დუტა სხირტლაძე მასთან დაპირისპირების გამო რამდენიმე თანამშრომლის, მათ შორის გოგი ჩაკვეტაძის გათავისუფლებას ჯერ კიდევ აპრილში გეგმავდა, მაგრამ გადაწყვეტილება მოულოდნელად შეცვალა.
