ახალგაზრდა იურისტები შეკრებებისა და მანიფესტაციების შესახებ კანონში აქციის პროპორციულობასთან დაკავშირებით დროის ფაქტორის გათვალისწინებას ითხოვენ. როგორც დღეს საია-ს წარმომადგენლებმა ადამიანის უფლებათა დაცვისა და ინტეგრაციის და იურიდიულ საკითხთა კომიტეტების გაერთიანებულ სხდომაზე აღნიშნეს, როდესაც საუბარია ერთი მხრივ, აქციის მონაწილეების უფლებების დაცვაზე და მეორე მხრივ, იმ ტერიტორიაზე მცხოვრები მოსახლეობისა და ბიზნესის წარმომადგენლების უფლებების დაცვაზე, აუცილებელია, ეს მუხლი დაკონკრეტდეს და ორმაგი წაკითხვის საშუალებას არ იძლეოდეს.
საია-ს ინიციატივით, აღნიშნულ მუხლში უნდა ჩაიწეროს, რომ პროპორციულობის დაცვაზე საუბარი იქნება იმ შემთხვევაში, თუ აქცია რამდენიმე დღეს ან თვეს გაგრძელდა.
კანონპროექტის ავტორებმა კონსულტაციების გამართვაზე თანხმობა განაცხადეს და ახალგაზრდა იურისტებს სთხოვეს, ინიციატივები და წინადადებები მიაწოდონ.
