წინააღმდეგობის მოძრაობის წევრი დაჩი ცაგურია წინასწარი დაკავების იზოლატორებთან აქციების ჩატარების შეზღუდვას აპროტესტებს. როგორც ცაგურიამ ადამიანის უფლებებისა და ინტეგრაციისა და იურიდიულ საკითხთა კომიტეტების გაერთიანებულ სხდომაზე განაცხადა, კანონში არ უნდა ჩაიწეროს, რომ პოლიციის შენობებთან და წინასწარი დაკავების იზოლატორებთან 20-მეტრიანი რადიუსის შეზღუდვა იქნება, რადგან ბოლო დროს სამართალდამცველების მხრიდან ხშირად ირღვევა ადამიანის უფლებები და ხალხს პროტესტის გამოხატვის საშუალება უნდა მიეცეს.
"პოლიცია ჯერ ქუჩაში არღვევს ადამიანის უფლებებს, შემდეგ იზოლატორში აგრძელებს მათ წამებას, ამიტომ პროტესტის გამოხატვასთან დაკავშირებით შეზღუდვები არ უნდა დაწესდეს", _ მიაჩნია ცაგურიას.
ცაგურია დაინტერესდა, ჰქონდა თუ არა იურიდიულ საკითხთა კომიტეტს თავმჯდომარეს, პავლე კუბლაშვილს, ინფორმაცია - აქციის მონაწილეებზე თავდასხმების დროს რომელიმე თავდამსხმელი თუ დაისაჯა. კუბლაშვილმა განაცხადა, რომ მსგავსი ინფორმაცია მას არ ეხება და ცაგურიას ურჩია, შესაბამის უწყებებში მოიკითხოს სტატისტიკა.
ცაგურიამ ასევე მოითხოვა, უცხო ქვეყნის მოქალაქეებისთვის აქციის ორგანიზატორობის უფლება მიეცათ, ასევე 18 წლამდე ასაკის მოზარდებს აქციების ჩატარების საშუალება მისცემოდათ.
კუბლაშვილმა განმარტა, რომ როგორც უცხო ქვეყნის, ასევე 18 წლამდე ასაკის მოზარდებს აქციის ჩატარება ეზღუდებათ მხოლოდ იმ შემთხვევაში, თუ საუბარია გზის გადაკეტვაზე, სხვა შემთხვევებში კი, შეუძლით ნებისმიერ ადგილას შეიკრიბონ.
