სტიქიისგან გამოწვეული დაზიანებების გამო, მეოთხე დღეა, ცივის მთაზე მდებარე სატელევიზიო ანძას ელექტროენერგია არ მიეწოდება. რეგიონში საერთო ეროვნული ტელეკომპანიების სიგნალი შეფერხებით ვრცელდება.
„სატელევიზიო ანძისთვის ელექტროენერგიის მიწოდება აქამდე იმიტომ ვერ მოხერხდა, რომ ელექტროგადამცემი ხაზები ტყეში გადის და ზოგიერთ ადგილზე ტექნიკის მისვლა შეუძლებელია. მდგომარეობას წვიმიანი ამინდებიც ართულებს. სადაც მისვლა შესაძლებელი იყო, იქ უკვე გადაბმულია ქარისგან დაწყვეტილი ელექტროგადამცემი სადენები. ვიმედოვნებთ, რომ ელექტროენერგიის აღდგენას ტექნიკური სამსახური უახლოეს მომავალში შეძლებს", - განუცხადა კახეთის საინფორმაციო ცენტრს „კახეთის ენერგოდისტრიბუციის" წარმომადგენელმა ჟანა დიდებაშვილმა.